بيىل ءبىرىڭعاي جيناقتاۋشى زەينەتاقى قورىنداعى سالىمشىلار جيناعىنىڭ جالپى سوماسى 15،1 تريلليون تەڭگەگە جەتتى.
Ranking.kz پورتالىنىڭ دەرەگىنشە، بىلتىرعى وسى ۋاقىتپەن سالىستىرعاندا زەينەتاقى جيناقتارىنىڭ كولەمى بىردەن 11،4%-كە نەمەسە 1،5 تريلليون تەڭگەگە ءوستى. كورسەتكىشتىڭ ءوسۋى جارنالار تۇرىندەگى كىرىس اعىندارى، سونىمەن قاتار ينۆەستيسيالىق كىرىس ەسەبىنەن قالىپتاستى.
- مىندەتتى زەينەتاقى جارنالارى بويىنشا جيناق كولەمى 11،1%-كە ارتىپ، 14،7 تريلليون تەڭگەگە جەتتى. بۇل قازاقستاندىقتاردىڭ بارلىق جيناقتارىنىڭ 97%ء-ى.
- مىندەتتى كاسىپتىك زەينەتاقى جارنالارى بويىنشا زەينەتاقى جيناقتارى ءبىر جىلدا 21%-كە ارتىپ، 466،4 ميلليارد تەڭگەگە جەتتى.
وڭىرلەر بويىنشا زەينەتاقى جيناقتارىنىڭ ەڭ كوپ مولشەرى الماتىدا — 2،8 تريلليون تەڭگە نەمەسە رەسپۋبليكاداعى جالپى كولەمنىڭ 18،5%ء-ى. ودان كەيىن استانا — 1،4 تريلليون تەڭگە. ۇزدىك ۇشتىكتى قاراعاندى وبلىسى تۇيىندەدى — 1،2 تريلليون تەڭگە.
زەينەتاقى جيناقتارىنىڭ كولەمى بويىنشا كوش باستاعان بەس ايماققا شىمكەنت قالاسى (1،2 تريلليون تەڭگە) مەن شىعىس قازاقستان وبلىسى (832،5 ميلليارد تەڭگە) دا كىردى.