قازاقستاندا ءار سالانى سيفرلاندىرۋ اقشا ۇنەمدەۋىن بەرۋدە
اعىمداعى جىلعى 1 ماۋسىمنان باستاپ ق ر ەڭبەك جانە حالىقتى الەۋمەتتىك قورعاۋ مينيسترلىگى سيفرلىق شەشىمدەردى ەنگىزۋ ەسەبىنەن زەينەتاقى تولەمدەرى مەن جاردەماقىلاردى اكىمشىلەندىرۋ بويىنشا شىعىستاردى وڭتايلاندىرۋ بويىنشا كەزەڭ-كەزەڭمەن جۇمىس جۇرگىزۋدە. بۇل شارا جىل سايىن رەسپۋبليكالىق بيۋدجەت قاراجاتىن 4،5 ملرد تەڭگەگە دەيىن ۇنەمدەۋگە مۇمكىندىك بەرەدى، دەپ حابارلادى Almaty-akshamy.kz. ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ سايتىنداعى حابارعا سىلتەمە جاساي وتىرىپ.
قازىرگى ۋاقىتتا ءاربىر جاردەماقى نەمەسە زەينەتاقى تولەمى ەكىنشى دەڭگەيدەگى بانكتەر مەن «قازپوشتا» اق-عا جەكە ەلەمەنت رەتىندە تۇسەدى، ول ءۇشىن كوميسسيالىق الىم الىنادى. ءتۇرلى تولەم ەلەمەنتتەرىن تولەمنىڭ ءبىر ەلەمەنتىنە بىرىكتىرۋ قازاقستاندىقتارعا تيەسىلى تولەمدەردى اكىمشىلەندىرۋگە جۇمسالاتىن شىعىنداردى بارىنشا ازايتۋعا مۇمكىندىك بەرەدى.
ەلەمەنتتەردى بىرىكتىرۋ كەزىندە رەسپۋبليكالىق بيۋدجەتتەن قارجىلاندىرىلاتىن تاعايىندالعان تولەمدەردىڭ ساناتى ەسكەرىلەدى. مىسالى، بازالىق زەينەتاقى تولەمىن تاعايىنداۋ كەزىندە ازاماتقا سونداي-اق: ىنتىماقتى زەينەتاقى تولەمى، ەكولوگيالىق ۇستەمەاقى جانە ت. ب. تاعايىندالۋى مۇمكىن.
«ءبىرىنشى كەزەڭدە ءبىز زەينەتاقى تولەمدەرى مەن ەكولوگيالىق ۇستەمەاقىنى بىرىكتىردىك. تەك ماۋسىم ايىندا ۇنەمدەۋ 384،2 ملن تەڭگەنى قۇرادى، ال بولاشاقتا ءبىز شامامەن 4،5 ملرد تەڭگەگە رەسپۋبليكالىق بيۋدجەتتىڭ جىل سايىنعى ۇنەمدەلۋىن كۇتەمىز. بۇل باعىتتاعى جۇمىستار جالعاساتىن بولادى»، – دەدى ەڭبەك جانە حالىقتى الەۋمەتتىك قورعاۋ ۆيسە-مينيسترى ەربول وسپانوۆ.