ەلىمىزدەگى ەڭ تومەنگى ەڭبەكاقىنىڭ مولشەرى 60 مىڭ تەڭگەدەن 70 مىڭ تەڭگەگە كوتەرىلۋىنە بايلانىستى زەينەتاقى جيناعىنىڭ ەڭ تومەنگى جەتكىلىكتىلىك شەگى تاعى ءوستى.
بۇل تۋرالى ءماجىلىس دەپۋتاتتارىنىڭ ساۋالىنا ۇلتتىق بانكتىڭ باسقارما ءتوراعاسى عالىمجان ءپىرماتوۆتىڭ جولداعان جاۋابىندا ايتىلعان، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
«ەڭ تومەنگى جەتكىلىكتىلىك شەگىنىڭ نەگىزگى مىندەتى – ەڭبەككە قابىلەتسىز جاستاعى ازاماتتاردىڭ تىنىس-تىرشىلىگى ءۇشىن زەينەتاقى جيناقتارىنىڭ ەڭ تومەنگى قاجەتتى دەڭگەيىن قامتاماسىز ەتۋ جانە حالىقارالىق ەڭبەك ۇيىمىنىڭ ۇسىنىستارىن ەسكەرە وتىرىپ، ولاردىڭ ەڭ تومەنگى قاجەتتىلىكتەرىن قاناعاتتاندىرۋ. وسىعان بايلانىستى زەينەتاقى جۇيەسى ازاماتتاردىڭ زەينەتاقى جيناقتارىنىڭ كولەمىن تومەنگى جەتكىلىكتى شەكتەن كەم ەمەس مولشەردە جيناقتاۋدى قامتاماسىز ەتۋى ءتيىس. ول شامانى انىقتاۋ زەينەتاقى جيناقتارىنىڭ ەڭ تومەنگى جەتكىلىكتى شەگىن ايقىنداۋ ادىستەمەسىنە سايكەس جۇزەگە اسىرىلادى»، - دەپ جازدى ع. ءپىرماتوۆ.
ال ەڭ تومەنگى جەتكىلىكتىلىك شەگىن ەسەپتەۋ كەزىندە قولدانىلاتىن كورسەتكىشتەردىڭ ءبىرى – ازاماتتاردىڭ ءومىر ءسۇرۋ دەڭگەيىنىڭ ەڭ تومەنگى ستاندارتىن قامتاماسىز ەتۋگە ارنالعان ەڭ تومەنگى جالاقى مولشەرى.
«2022 جىلى تومەنگى جەتكىلىك شەگىنىڭ وسۋىنە تومەنگى ەڭبەكاقى مولشەرىنىڭ ايتارلىقتاي ءوسۋى (42،5 مىڭ تەڭگەدەن 60 مىڭ تەڭگەگە دەيىن) اسەر ەتتى. سونىمەن قاتار مەملەكەت باسشىسىنىڭ 2022 جىلعى 1 قىركۇيەكتەگى قازاقستان حالقىنا جولداۋىندا ايتىلعان تاپسىرماسىنا سايكەس 2023 جىلدان باستاپ تومەنگى ەڭبەكاقى مولشەرى 60 000 تەڭگەدەن 70 000 تەڭگەگە دەيىن ۇلعايتىلادى. بۇل 2023 جىلعا بەلگىلەنگەن تومەنگى جەتكىلىكتىلىك شەگىنىڭ مولشەرىنە دە اسەر ەتتى»، - دەلىنگەن ۇلتتىق بانك باسشىسىنىڭ جاۋابىندا.