قورعانىس ءمينيسترىنىڭ ورىنباسارى تاراز قالاسىنىڭ ەمدەۋ مەكەمەلەرىن ارالادى.
قورعانىس مينيسترلىگى جامبىل وبلىسىندا زارداپ شەككەندەرگە كومەك كورسەتۋ ماسەلەلەرىن شەشىپ جاتىر، دەپ حابارلايدى Almaty-akshamy.kz قورعانىس مينيسترلىگىنىڭ سايتىنا سىلتەمە جاساپ.
قورعانىس ءمينيسترىنىڭ ورىنباسارى گەنەرال-مايور مۇحامەدجان تالاسوۆ تاراز قالاسىنىڭ ەمدەۋ مەكەمەلەرىن ارالادى. ول ستاسيوناردا ەمدەلىپ جاتقان ادامداردىڭ حال-جاعدايىمەن تانىستى. قورعانىس مينيسترلىگىنىڭ جۇمىس توبى قازا تاپقانداردىڭ وتباسىلارىمەن قاجەتتى جۇمىس جۇرگىزۋدە. اتاپ ايتقاندا ولارعا زاڭنامادا بەلگىلەنگەن تولەمدەر مەن جەڭىلدىكتەردى الۋ ءتارتىبى دە تۇسىندىرىلەدى. بۇدان باسقا، مۇحامەدجان تالاسوۆ زارداپ شەككەندەردىڭ ەشقايسىسى نازاردان تىس قالمايتىنىن اتاپ ءوتتى.
«ءبىز ءتيىستى وتەماقىلار مەن جاردەماقىلاردى تولەۋگە بايلانىستى ماسەلەلەردى مۇمكىندىگىنشە تەزىرەك شەشۋ ءۇشىن قولدان كەلگەننىڭ ءبارىن جاسايمىز. قاجەت بولعان جاعدايدا وتباسى مۇشەلەرىنە جۇمىسقا ورنالاسۋعا كومەك كورسەتىلەدى. سونداي-اق قازا تاپقانداردىڭ بالالارىنا قامقورلىق كورسەتەمىز. بۇل رەتتە ولاردى قورعانىس مينيسترلىگىنىڭ ءبىلىم بەرۋ ورىندارىنا وقۋعا قابىلداۋعا جاردەم كورسەتىلەدى»، – دەدى قورعانىس ءمينيسترىنىڭ ورىنباسارى.