قازاقستاندا پوليسەيلەر بەس كۇندە ەل بويىنشا 46 مىڭ كولىكتى تەكسەرگەن.
ولار جەكە تاسىمالداۋمەن اينالىساتىن 1080 شەتەلدىكتى انىقتادى، ولاردىڭ 691ء-ى كوشى-قون زاڭناماسىن بۇزعان، دەپ حابارلايدى aqshamnews.kz.
ءتارتىپ ساقشىلارى «ءقاۋىپسىز جول» وپەراسياسى بارىسىندا جۇزدەگەن كوشى-قون ەرەجەلەرىن بۇزۋ فاكتىلەرىن انىقتادى.
«234 شەتەلدىك زاڭسىز جۇمىسقا ورنالاسقانى ءۇشىن، 457ء-سى قازاقستان رەسپۋبليكاسىندا بولۋ شارتتارىن بۇزعانى ءۇشىن جاۋاپكەرشىلىككە تارتىلدى. سوت شەشىمىمەن 175 شەتەلدىك تاكسي جۇرگىزۋشىسى ەلدەن شىعارىلدى، ونىڭ ىشىندە 103 ادام جەكە باسىن انىقتاۋ ءۇشىن ۋاقىتشا ۇستاۋ يزولياتورىنا قامالدى»، - دەپ حابارلادى ءىىم.
شەتەلدىكتەردى جۇمىسقا زاڭسىز تارتقان 38 قازاقستاندىق اكىمشىلىك جاۋاپكەرشىلىككە تارتىلدى.
تاۋلىگىنە 15-20 ساعات بويى زاڭسىز تاكسي جۇرگىزەتىن شەتەلدىكتەر اپات ءقاۋپىن ارتتىرادى.
استانادا وسىنداي بەس پاتەر يەسى انىقتالدى. ولارعا ايىپپۇل سالىندى. مۇنداي فاكتىلەر الماتى، ماڭعىستاۋ جانە باتىس قازاقستان وبلىستارىندا دا انىقتالدى.