15 جەلتوقساننان باستاپ پوليسەيلەر رەسپۋبليكا اۋماعىندا زاڭسىز اعاش كەسۋدى انىقتاۋ جانە جولىن كەسۋ شارالارىن باستادى. بۇل تۋرالى ق ر ىشكى ىستەر مينيسترلىگىنىڭ وكىلى شۇعىلا تۇرلىبەك ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
باقىلاۋدى كۇشەيتۋ ماقساتىندا اۆتوجولداردا، سونداي-اق بازارلاردا جانە باسقا جەرلەردە 300-دەن استام ءموبيلدى توپ قۇرىلعان.
«جاڭاجىلدىق مەرەكەلەر قارساڭىندا پوليسەيلەر تابيعاتتى قورعاۋ زاڭناماسىنىڭ ساقتالۋىن باقىلاۋدى كۇشەيتتى. ەلدى مەكەندەردە قىلقان جاپىراقتى اعاشتاردىڭ ساتىلۋىن باقىلاۋ، ولاردى بەلگىلەنبەگەن جەردە ساتۋعا تىيىم سالۋ، سونداي-اق ءتيىستى قۇجاتتارعا تەكسەرۋ جۇرگىزىلەدى»، - دەدى ىشكى ىستەر مينيسترلىگىنىڭ وكىلى اپتالىق ونلاين بريفينگىدە.
ونىڭ ايتۋىنشا، قىلقان جاپىراقتى اعاشتى ساتۋعا رۇقسات بولماسا، ساتۋشى جاسىل جەلەكتى كۇتىپ ۇستاۋ جانە قورعاۋ ەرەجەلەرىن بۇزعانى ءۇشىن اكىمشىلىك جاۋاپكەرشىلىككە تارتىلۋى مۇمكىن.
وسى باپ بويىنشا: جەكە تۇلعالارعا 15 اەك مولشەرىندە، شاعىن كاسىپكەرلىك سۋبەكتىلەرىنە نەمەسە كوممەرسيالىق ەمەس ۇيىمدارعا 30 اەك، ورتا كاسىپكەرلىك سۋبەكتىلەرىنە 50 اەك، ءىرى كاسىپكەرلىك سۋبەكتىلەرىنە 150 اەك مولشەرىندە ايىپپۇل سالىنادى نەمەسە ەسكەرتۋلەر جاسالادى.
«ورمان كوشەتتەرىن زاڭسىز كەسۋ انىقتالعاندا، ق ر قىلمىستىق كودەكسىندە باس بوستاندىعىنان ايىرۋ تۇرىندەگى ەڭ جوعارى جازا كوزدەلەدى. اتالعان الدىن الۋ شاراسى جاڭاجىلدىق مەرەكەلەرگە دەيىن جالعاسادى»، - دەيدى ش. تۇرلىبەك.