زاڭسىز شوت-فاكتۋرالار جازعان الاياققا ۇكىم شىعارىلدى

سوت وتىرىسى بارىسىندا سوتتالۋشى ب. ءوز كىناسىن مويىندادى.

مەملەكەتكە كەلتىرىلگەن زالال 837 ملن. تەڭگەنى قۇرادى، ونىڭ 100 ملن. تەڭگەسى وتەلدى، دەپ حابارلايدى Almaty-akshamy.kz

الماتى قالالىق №2 بوستاندىق اۋداندىق سوتىندا ورىندالماعان جۇمىستارعا شوت-فاكتۋرالاردى جازىپ بەرگەنى ءۇشىن كىنالى دەپ تانىلعان ازاماتقا قاتىستى قىلمىستىق ءىس قارالدى.

سوت 2017 جىلدىڭ قازان ايى مەن 2020 جىلدىڭ جەلتوقسان ارالىعىندا ب. ەسىمدى سوتتالۋشىنىڭ ك.، پ.، م.، ت. ەسىمدى تانىستارىنىڭ اتىنا 4 كاسىپورىندى تىركەگەنىن انىقتادى.

بۇل كاسىپورىندار ناقتى جۇمىستار جاساماي، جالعان مامىلە جاساۋ ارقىلى جەكە كاسىپكەرلىك سۋبەكتىلەرى - كونتراگەنتتەردىڭ قاراجاتىن زاڭدى اينالىمنان شىعارۋمەن اينالىسقان.

اۋداندىق سوتتىڭ باسپا ءسوز قىزمەتىنىڭ مالىمەتىنشە، سوتتىڭ ۇكىمى بويىنشا سوتتالۋشى ب. ءىس جۇزىندە ورىندالماعان جۇمىستارعا شوت-فاكتۋرالاردى جازعانى ءۇشىن كىنالى دەپ تانىلدى. وعان قارجى قۇرىلىمدارىندا ماتەريالدىق جاۋاپتى لاۋازىمداردى اتقارۋ قۇقىعىنان 5 جىل مەرزىمگە ايىرا وتىرىپ، 3،6 جىل باس بوستاندىعىنان ايىرۋ جازاسى تاعايىندالدى. ۇكىم زاڭدى كۇشىنە ەنگەن جوق.