دەلدالدىق جانە مىندەتتى راستاۋ قىزمەتتەرىن جارنامالاۋعا تىيىم سالىنادى.
تەحنيكالىق رەتتەۋ جانە مەترولوگيا كوميتەتى قازاقستاننىڭ سايكەستىكتى باعالاۋ نارىعىندا ينتەرنەت-رەسۋرستاردا سايكەستىك سەرتيفيكاتى مەن سايكەستىك تۋرالى دەكلاراسيالاردى جەدەل الۋ بويىنشا قىزمەت كورسەتەتىن كونسالتينگتىك كومپانيالار جۇمىس ىستەيتىنىن انىقتادى، دەپ حابارلايدى Almaty-akshamy.kz Inbusiness.kz سىلتەمە جاساپ.
ايتا كەتسەك، "سايكەستىكتى باعالاۋ سالاسىنداعى اككرەديتتەۋ تۋرالى" زاڭعا سايكەس، سەرتيفيكاتتاۋ جانە سىناق جۇمىستارىن تەك اككرەديتتەلگەن راستاۋ ورگاندارى مەن سىناق زەرتحانالارى جۇرگىزەدى.
سونىمەن قاتار "جارناما تۋرالى" زاڭعا سايكەس، سايكەستىكتى باعالاۋ سالاسىنداعى اككرەديتتەۋ تۋرالى زاڭنامادا بەلگىلەنگەن تارتىپپەن اككرەديتتەلمەگەن ۇيىمدارعا ءونىمنىڭ سايكەستىگىن راستاۋ سالاسىنداعى سايكەستىكتى، دەلدالدىق جانە مىندەتتى راستاۋ قىزمەتتەرىن جارنامالاۋعا تىيىم سالىنادى.
"كونسالتينگ كومپانيالارىنىڭ بۇل ينتەرنەت-رەسۋرستارى كەي جاعدايلاردا ناقتى سىناقسىز سايكەستىكتى راستاۋ قۇجاتتارىن جەدەل الۋعا كومەكتەسەدى. سونىمەن قاتار بۇل كومپانيالار قىرعىزستاندا قۇجاتتاردىڭ ەڭ از پاكەتىمەن جانە قىسقا مەرزىمدە سايكەستىكتى راستايتىن قۇجات الۋدى ۇسىنادى. وسىعان بايلانىستى اقدم-نەن ءوز قۇزىرەتى شەگىندە اتالعان سايتتارعا شارا قابىلداۋدى سۇرادىق"، - دەدى تەحنيكالىق رەتتەۋ جانە مەترولوگيا كوميتەتىنىڭ ءتوراعاسى قۋانىش ەلىكبايەۆ.
ءوز كەزەگىندە اقپارات مينيسترلىگى ينتەرنەت-رەسۋرستارعا مونيتورينگ جۇرگىزدى. مونيتورينگ ناتيجەسىندە ق ر "بۇقارالىق اقپارات قۇرالدارى تۋرالى"، "جارناما تۋرالى" زاڭدارىن جانە اكىمشىلىك قۇقىقبۇزۋ كودەكسىن بۇزۋ فاكتىلەرى انىقتالعان. وسىدان سوڭ قازاقستان اۋماعىندا 22 ينتەرنەت-رەسۋرستىڭ جۇمىسى شەكتەلدى.
سونداي-اق، ونلاين-جارناما پلاتفورمالارىنان زاڭسىز ماتەريالداردى جويۋ ماقساتىندا رەسۋرس يەلەرىنە ۇسىنىس حات جولداندى.