تانىمال زاڭگەر ايگۇل ورىنبەك داريعا بادىقوۆانىڭ بۇرىنعى كۇيەۋىنە ارىز ءتۇسىردى، - دەپ حابارلايدى اqshamnews.kz ءتىلشىسى.
بۇل تۋرالى ول الەۋمەتتىك جەلىدەگى پاراقشاسىندا ءبولىستى.
ول جەكە ادامنىڭ ومىرىنە قاتىستى اقپاراتتى جاريالاۋدىڭ تەك ادەپسىزدىك ەمەس، قىلمىستىق جاۋاپكەرشىلىككە اكەلەتىن ارەكەت ەكەنىن ەسكەرتتى.
"زاڭدى بىلمەۋ جاۋاپكەرشىلىكتەن بوساتپايدى. وتباسىلىق قۇپيانى بۇزۋ - بۇل جاي عانا ادەپسىزدىك ەمەس، زاڭ الدىندا ناقتى قىلمىستىق جاۋاپكەرشىلىككە اكەلەتىن ارەكەت. كۇيەۋى مۇنى بىلمەۋى مۇمكىن، ءبىراق جۋرناليستەردىڭ زاڭنان بەيحابار بولۋى مۇمكىن ەمەس"، - دەدى ايگۇل ورىنبەك.
زاڭگەردىڭ ايتۋىنشا، بالا اسىراپ الۋ - جەكە جانە وتباسىلىق ومىرگە قاتىستى قۇپيا اقپارات، ونى جاريالاۋ ق ر قىلمىستىق كودەكسىنىڭ 146 جانە 147-باپتارىنا سايكەس جازالاناتىن ارەكەت.
146-باپ - بالا اسىراپ الۋ قۇپياسىن جاريا ەتۋ،
147-باپ - جەكە ومىرگە قول سۇعىلماۋشىلىقتى بۇزۋ دەپ كورسەتىلگەن.
"مەن داريعانى كوپ جىلدان بەرى جاقسى تانيمىن. اجىراسۋ كەزەڭىندە قانداي قيىندىقتاردان وتكەنىن دە بىلەمىن. سوندىقتان ونىڭ زاڭدى مۇددەسىن قورعاۋشى وكىلى رەتىندە، جىلقىشىباي مەن دارحاننىڭ ارەكەتىنە قاتىستى قىلمىستىق ءىس قوزعاۋ تۋرالى ارىزدى الماتى قالاسىنىڭ ىشكى ىستەر دەپارتامەنتىنە رەسمي تۇردە جولدايمىن"، - دەپ مالىمدەدى زاڭگەر.
ايگۇل ورىنبەك بۇل وقيعانى تەك جەكە تۇلعانىڭ ار-نامىسى مەن بەدەلىنە قاتىستى ماسەلە ەمەس، قوعامداعى جۋرناليستىك ەتيكا مەن زاڭ ۇستەمدىگىنە قاتىستى جاعداي دەپ باعالادى.
"بارلىق ب ا ق مەديا زاڭناماسىن قاتاڭ ساقتاۋعا، جەكە تۇلعالاردىڭ جەكە ومىرىنە قول سۇقپاۋعا شاقىرامىن. جۋرناليست - ەڭ الدىمەن قوعام الدىنداعى جاۋاپكەرشىلىكتى سەزىنەتىن ادام. سوندىقتان رەيتينگ ءۇشىن بىرەۋدىڭ تاعدىرىن تالقىعا سالۋ كاسىبي ابىرويعا كولەڭكە تۇسىرەدى"، - دەدى ول.
زاڭگەردىڭ ايتۋىنشا، مۇنداي جاعدايلار قوعامداعى جەكە ومىرگە قۇرمەت پەن كاسىبي ەتيكانىڭ قانشالىق ماڭىزدى ەكەنىن ەسكە سالادى. اقپارات تاراتقاندا ادام تاعدىرى مەن زاڭ تالاپتارىن ەسكەرمەۋ جۋرناليستيكا ميسسياسىنا قايشى.