قازاقستاننىڭ ستراتەگيالىق زەرتتەۋلەر ينستيتۋتى قوعام اراسىندا تەرەڭ ورنىققان قۇندىلىقتاردىڭ يەرارحياسىنا ارنالعان الەۋمەتتىك زەرتتەۋ جۇرگىزدى.
ساۋالناما ناتيجەسىنە سايكەس «زاڭ جانە ءتارتىپ» قاعيداتى ازاماتتارىمىز ءۇشىن اسا ماڭىزدى سانالاتىن جالپىۇلتتىق قۇندىلىقتار قاتارىنا ەندى («ادىلدىك» – 84،1%، «زاڭ جانە ءتارتىپ» – 83،5%، «ەڭبەك» – 83،4%).
پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا سويلەگەن سوزىندە «زاڭ جانە ءتارتىپ» قاعيداتىن ودان ءارى ورنىقتىرۋ جانە قۇقىقبۇزۋشىلىقتىڭ كەز كەلگەن تۇرىنە «مۇلدەم توزبەۋشىلىك» ۇستانىمىن قالىپتاستىرۋ قاجەتتىگىنە باسا نازار اۋدارعانى تەگىن ەمەس.
ايتا كەتۋ كەرەك، زاڭ ۇستەمدىگىنىڭ قامتاماسىز ەتىلۋى جانە ونى بۇزعانى ءۇشىن جازانىڭ بۇلتارتپاستىعى – مەملەكەتتىڭ نەگىزگى مىندەتىنىڭ ءبىرى. سوندىقتان الەمنىڭ كوپتەگەن ەلىندە ءتارتىپ پەن تۇراقتىلىقتى نىعايتۋعا دەگەن قوعامدىق سۇرانىستىڭ وزەكتىلىگى ارتىپ كەلەدى.