جۋىردا الماتىدا پروفەسسور ايگۇل ۇلكەنبايەۆا مەن اعا وقىتۋشى ەرجان جامەڭكەيەۆتىڭ جانە شاكىرتتەرىنىڭ قاتىسۋىمەن «MODEL 2.1.5. Dem al» اتتى شىعارماشىلىق كونسەرت ءوتتى.
اتالعان كەشتە «قازاقستان داۋىسى» مەگا جوباسىنىڭ ءفيناليسى، ءانشى جاينا تارعىنوۆا مەن كونسەرتمەيستەر، ونەرتانۋ عىلىمدارىنىڭ ماگيسترى، وقىتۋشى قۇرمەت ەرجانات تا بوي كورسەتتى. كورەرمەندى ادەمى اسەرگە بولەگەن شىعارماشىلىق كەشتىڭ نەگىزگى ماقساتى – «قازىرگى تاڭدا ورتا نەمەسە جوعارى ءبىلىم وشاقتارىنان تۇلەپ ۇشقان دومبىراشى مودەلى قانداي بولۋى كەرەك؟» دەگەن سۇراققا جاۋاپ بەرۋ.
كۇيشىلەر دومبىرا قۇلاعىندا ويناۋمەن عانا شەكتەلمەي، الەمدىك دەڭگەيدە ونەر كورسەتۋ ءۇشىن وزگە ۇلت مادەنيەتىنىڭ شەديەۆرلەرىمەن تانىسىپ، اۋەزدى اندەرىن دومبىراعا يكەمدەپ جاڭا دومبىراشىنىڭ مودەلىن ۇسىندى. شارتتى تۇردە بەكىتىلگەن MODEL 2.1.5 ساندارى دا كونسەرت ماقساتىن ءدال ايقىنداي تۇرعانداي. 2 سانى قوس ىشەكتى دومبىراداعى كۇيمەن قاتار جۇرەتىن سان الۋان اۋەن ۇلگىسى بولسا، 1 سانى – ا. ۇلكەنبايەۆانىڭ ءوز ۇلگىسى، ياعني كۇيمەن قاتار ءتۇرلى جانرداعى شىعارمالاردى ورىنداپ ءارى ۇيرەتە الاتىن بىلىكتى مامان بولا الۋ. 5 سانى – شارتتى سان بولىپ ەسەپتەلەدى. بۇل – بۇگىنگى دومبىراشى بەساسپاپ مۋزىكانت بولۋى كەرەك دەگەن ءسوز. بويدا قانداي دا ءبىر باسقا ونەر بولسا، ونى ءسوندىرىپ الماي قايتا جانداندىرۋ دەگەندى بىلدىرەدى. دومبىراشىلار سىبىزعى تارتىپ، جەتىگەندە ويناپ، باس گيتارانى شەرتىپ، كەشكە جاڭا رەڭك بەرىپ وتىردى. زاماناۋي جاستاردىڭ امبەباپتىعى جاڭا دومبىراشى مودەلىن وسىلاي كورسەتتى.
كەش جاڭا تۋىندىلار، وڭدەۋلەر مەن لايىقتاۋلار جانە وتە سيرەك ورىندالاتىن كۇيلەرمەن اسەرلى بولا ءتۇستى. اتاپ ايتساق، ابىكەن حاسەنوۆتىڭ 1950 جىلى كۇيشى ءشامشى ەلەبەكوۆتەن جازىلىپ الىنعان «قوسباسار» كۇيىن كونسەرۆاتوريانىڭ 3 كۋرس ستۋدەنتى بەرەكە احمەتوۆا شەرتتى. قوجەكە نازار ۇلىنىڭ «كۇي شاقىرتقىسىن» ەرجان جامەڭكەيەۆ ورىنداسا، كونسەرۆاتوريانىڭ 2 كۋرس ستۋدەنتى بەرىك ساتوۆ جەمەنەي بوراشتىڭ ءانى «داۋىلپازدى»، ە. ۇسەنوۆ «كەربەز سۇلۋ» شىعارماسىن شەكتى كۆارتەتكە ابىلحايىر ساعىمبايەۆ لايىقتاسا، دومبىراشىلار انسامبلىنە لايىقتاعان تۇرلىحان اققالييەۆتىڭ تۋىندىسىمەن ا. ۇلكەنبايەۆا جانە شاكىرتتەرى ونەر كورسەتتى. قازانعاپتىڭ كۇيى «اقجەلەڭ»، حالىق ءانى «اقداريعا»، ي. ءتاماريننىڭ «كۋبينسكيي تانەس» ، و. سۇلەيمەنوۆتىڭ شىعارماسى «باتىس-شىعىس» ، ا. ارحيپوۆسكيي «زولۋشكا» شىعارمالارى دا ساحنالاندى. ارميك داشچەنىڭ «مالاگا» اتتى شىعارماسىن مارات نۇكەيەۆ دومبىراشىلار انسامبلىنە لايىقتاپ، يسپان تۋىندىسىمەن قاتار، وزبەكتىڭ حالىق اۋەندەرىنەن دە شاشۋ شاشتى.
كەش سوڭى ەسكەندىر حاسانعالييەۆتىڭ «جانارىم» انىمەن تۇيىندەلدى. شىعارماشىلىق كەشكە كەلگەن ءاربىر كورەرمەن جاڭاشىلدىقتى سەزىنىپ، كوڭىلدى كۇيدە تارقاستى.