ءىس-شاراعا كىتاپحانا وقىرماندارى، زاعيپ جاندار، مەكتەپ وقۋشىلارى قاتىستى.
نۇر-سۇلتان قالاسىنىڭ «ورتالىقتاندىرىلعان كىتاپحانالار جۇيەسى» كمم كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحاناسى تولقىن قابىلشانىڭ «وسى ءبىر ءسات ۇنايدى» اۋديوكىتابىنىڭ تۇساۋكەسەرىن وتكىزدى، دەپ حابارلايدى Almaty-akshamy.kz ەلوردا اكىمدىگىنىڭ رەسمي سايتىنا سىلتەمە جاساپ.
بۇل ءىس-شارا – كىتاپحانانىڭ «دىبىستاندىرىلعان الەم» جوباسى اياسىنداعى زاعيپ جاندارعا ارنالعان كىتاپتاردى دىبىستاۋ جۇمىسىنىڭ ناتيجەسى.
«ەلوردانىڭ تورىندە ارنايى كىتاپحانادا مازمۇندى شارا ءوتتى. بۇل جيىن سونداي ءبىر جۇرەككە جىلى، ەرەكشە اسەر قالدىردى. سەبەبى مۇنداعى وقىرماندار كوز جانارى ناشار كورگەنمەن جۇرەگى جىرعا قۇمار، قازاقتىڭ پوەزياسىنا سونشالىقتى ىنتىزار. بۇگىن دۇنيەگە كەلىپ جاتقان اۋديو جىر كىتابى جانارىنان ايرىلعان وقىرماندار ءۇشىن اقىندىق الەمگە بوي ۇراتىن سىي دەپ بىلەمىن. مۇندا ءومىردى ەرەكشە سۇيەتىن، جۇرەگى نازىك جاندار بار. وسىنداي جاندار باردا الەمدە مەيىرىم، ماحاببات ماڭگىلىك بولماق»، - دەدى قازاقستان جازۋشىلار وداعىنىڭ مۇشەسى تولقىن قابىلشا.
تۇساۋكەسەر – پوەزيالىق ولەڭ كەشى، وقىرمان مەن اۆتور اراسىنداعى ديالوگ، اۆتور قولتاڭباسى فوتو-سەسسياسى جانە ارنايى كەلگەن زيالى قاۋىم وكىلدەرىنىڭ وي-پىكىرىمەن الماسۋ، پىكىرتالاس فورماتىندا ءوتتى.