2025 جىلدىڭ 14 ناۋرىزىندا «Almaty Polytechnic College» بازاسىندا الماتى قالاسىنىڭ 1-2 كۋرس كوللەدج ستۋدەنتتەرى اراسىندا قالالىق «XXI عاسىر كوشباسشىسى» ينتەللەكتۋالدى ويىنى ءوتتى، دەپ حابارلايدى aqshamnews.kz
ءىس-شارا الماتى قالاسى ءبىلىم باسقارماسىنىڭ «جۇمىسشى ماماندىقتار جىلى-2025» مەديا جوسپارى اياسىندا ۇيىمداستىرىلدى. ءبىلىم سايىسىنىڭ نەگىزگى ماقساتى – ءبىلىم الۋشىلاردىڭ تانىمدىق قىزىعۋشىلىعىن ارتتىرۋ، كوشباسشىلىق قاسيەتتەرىن انىقتاۋ، ءوز ەلىن، ءتىلىن، وتانىن قۇرمەتتەيتىن پاتريوتتىق تاربيە قالىپتاستىرۋ.
ويىنعا الماتى قالاسىنداعى 17 كوللەدجدەن ستۋدەنتتەر قاتىستى. قاتىسۋشىلاردىڭ ءبىلىم دەڭگەيىن باعالاۋ ءۇشىن قازىلار القاسى ارنايى شاقىرىلدى. قازىلار قۇرامىندا وقۋ-اعارتۋ مينيسترلىگىنىڭ رەسپۋبليكالىق عىلىمي پەداگوگيكالىق قىزمەتكەرى، تاريحشى اكايەۆا گاليا اتيبايەۆنا، «ورلەۋ» باۇو» اقف الماتى قالاسى بويىنشا كاسىبي دامۋ ينستيتۋتىنىڭ اعا وقىتۋشىسى، گەوگرافيا عىلىمدارىنىڭ ماگيسترى سابيحانوۆا اسەل كايربەكوۆنا، قازاق ۇلتتىق قىزدار پەداگوگيكالىق ۋنيۆەرسيتەتىنىڭ ساياسي عىلىمدارىنىڭ كانديداتى، قوعامدىق گۋمانيتارلىق پاندەر كافەدراسىنىڭ دوسەنتى يسايەۆ ابلازيز ۋكيبايەۆيچ، №202 مەكتەپ-گيمنازيانىڭ ورىس ءتىلى مامانى بەكجانوۆا جانات يسمايلوۆنا جانە «Almaty Polytechnic College» اعىلشىن ءتىلى مامانى توقتارباي مادينا ايدارحان قىزى بولدى.
ينتەللەكتۋالدى ويىن 6 كەزەڭنەن تۇردى: «بايگە» كەزەڭىندە قاتىسۋشىلار سۇراقتارعا جاۋاپ بەرىپ، بىلىمدەرى مەن جىلدامدىقتارىن سىنادى، «پوليگلوت» كەزەڭىندە كوپ ءتىلدى مەڭگەرۋ دەڭگەيىن كورسەتتى، «كوكپار» كەزەڭىندە لوگيكالىق جانە تانىمدىق سۇراقتارعا جاۋاپ بەردى، «ەگەر مەن... بولسام» كەزەڭىندە كوشباسشىلىق قابىلەتتەرىن تانىتتى، «شەشەندىك ونەر» كەزەڭىندە ويىن جۇيەلى جەتكىزۋ قابىلەتتەرىن كورسەتتى، ال «جورعا» كەزەڭىندە جىلدام ويلاۋ جانە ءبىلىم دەڭگەيلەرىن دالەلدەۋگە مۇمكىندىك الدى. قاتىسۋشىلار تاريح، گەوگرافيا، فيلوسوفيا، قۇقىقتانۋ، ساياساتتانۋ جانە مادەنيەتتانۋ پاندەرىنە قاتىستى سۇراقتارعا جاۋاپ بەرىپ، ءوز ويلارىنىڭ ۇشقىرلىعىن، شىعارماشىلىق قابىلەتتەرىن، شەشەندىك ونەرىن جانە تاباندىلىق قاسيەتتەرىن كورسەتە ءبىلدى. سايىس ناتيجەلەرى ءادىل باعالانىپ، جۇلدەگەرلەر انىقتالدى.
جەڭىمپازدار قاتارى كەلەسىدەي انىقتالدى: باس جۇلدە – «XXI عاسىر كوشباسشىسى» اتاعىن جوعارعى مەديسينا كوللەدجىنىڭ 2-كۋرس ستۋدەنتى مارات قىزى نازگۇل يەلەندى، جەتەكشىسى – تۋرلىبايەۆا گۇلنۇر. ءبىرىنشى ورىندى «Almaty Polytechnic College» 2-كۋرس ستۋدەنتى ءىزباسار ايىم يەلەنسە، ونىڭ جەتەكشىسى – بايسەيتوۆا ءاليا. ەكىنشى ورىن №2 الماتى گۋمانيتارلىق-پەداگوگيكالىق كوللەدجىنىڭ 2-كۋرس ستۋدەنتى يبرايەۆا ارۋناعا بۇيىردى، جەتەكشىسى – باتىرحانوۆا عازيزا. ال ءۇشىنشى ورىنعا الماتى قۇرىلىس-تەحنيكالىق كوللەدجىنىڭ 1-كۋرس ستۋدەنتى بەيسەن قىزى جۇلدىز لايىق دەپ تانىلدى، جەتەكشىسى – تولەگەن ءانيپا.
جەڭىمپازداردى شىن جۇرەكتەن قۇتتىقتايمىز! بۇل ينتەللەكتۋالدى ويىن جاستاردىڭ ءبىلىمىن شىڭداپ، كوشباسشىلىق قاسيەتتەرىن دامىتۋعا زور مۇمكىندىك بەردى. بارلىق قاتىسۋشىلارعا الداعى ۋاقىتتا ساتتىلىك تىلەيمىز!