WhatsApp ونلاين-الاياقتار ءۇشىن بارعان سايىن تانىمال قۇرالعا اينالۋدا. ولار زاماناۋي الداۋ تاسىلدەرىن بەلسەندى قولدانىپ ءجۇر، ولاردىڭ ءبىرى — ستەگانوگرافيا.
بۇل قالاي جۇمىس ىستەيتىنىن Stopfake.kz سايتى مالىمدەدى، دەپ حابارلايدى aqshamnews.kz.
2025 جىلعى ساۋىردە Hindustan Times جاڭالىقتار پورتالى ءۇندىستاننىڭ دجابالپۋر قالاسىندا ورىن العان وقيعا تۋرالى حابارلادى. قالا تۇرعىنى WhatsApp ارقىلى بەيتانىس نومىردەن كەلگەن سۋرەت فايلىن اشقان سوڭ، ءىرى كولەمدە اقشاسىنان ايىرىلعان.
الاياقتار گرافيكالىق فايلداردىڭ ىشىنە زياندى كودتاردى جاسىرىن تۇردە ەنگىزۋگە مۇمكىندىك بەرەتىن ستەگانوگرافيا تەحنولوگياسىن پايدالانعان. مۇنداي سۋرەتتەر سىرت كوزگە قاراپايىم بولىپ كورىنەدى، ءبىراق اشقاننان كەيىن ول قۇرىلعىعا زياندى باعدارلامانى اۆتوماتتى تۇردە ورناتۋى مۇمكىن. بۇل باعدارلاما قۇپيا اقپاراتتارىڭىزعا: بانك ەسەپشوتتارىنا، قۇپيا سوزدەرگە، حابارلامالارعا، ءتىپتى قۇرىلعىنى تولىق قاشىقتان باسقارۋعا مۇمكىندىك بەرەدى.
2025 جىلعى 25 ساۋىردە WhatsApp پروۆايدەرى GREEN-API بۇل قاتەر تۋرالى رەسمي ەسكەرتۋ جاسادى.
«WhatsApp-تىڭ Windows نۇسقاسىندا (CVE-2025-30401) وسالدىق انىقتالدى. بۇل وسالدىق زياندى فايلدى اشۋعا يتەرمەلەۋ ارقىلى بق ىسكە قوسۋعا مۇمكىندىك بەرەدى. بۇل وسالدىقتىڭ GREEN-API سەرۆيسىنە قاتىسى جوق، ول تەك Windows-قا ارنالعان WhatsApp قوسىمشاسىنا عانا قاتىستى»، — دەلىنگەن رەسمي حابارلامادا.
پايدالانۋشىلارعا قوسىمشانى جاڭارتۋعا جانە فايل العان كەزدە وتە ساق بولۋعا كەڭەس بەرىلدى.
«WhatsApp-تا تانىس ادامداردان كەلگەن فايلداردى اشاردا دا وتە مۇقيات بولىڭىز. فايلدىڭ كەڭەيتىمىن (فورماتىن) تەكسەرىڭىز. ەگەر كەڭەيتىلۋى كۇماندى بولسا (مىسالى، “.exe”، “.vbs”، “.scr”) — اشپاڭىز.
قازىرگى دەرەكقورلارمەن جاڭارتىلعان انتيۆيرۋستىق باعدارلامالاردى پايدالانىڭىز. بۇل زياندى فايل ارقىلى تارالاتىن ۆيرۋستاردان قۇرىلعىڭىزدى قورعاۋعا كومەكتەسەدى»، — دەلىنگەن GREEN-API سايتىنداعى ەسكەرتۋدە.
سونداي-اق WhatsApp قوسىمشاسىنىڭ رەسمي سايتىندا فايل جىبەرۋشىنىڭ سەنىمدىلىگىن تەكسەرۋ قاجەتتىگى ۇنەمى ەسكەرتىلەدى.
ينتەرنەتتە شىنايى كيبەرشابۋىلدارمەن قاتار، جالعان حابارلامالار دا ءجيى تاراتىلادى. مىسالى، 2022 جىلى WhatsApp-تا قايىرلى تاڭ نەمەسە جاقسى كۇن تىلەگەن سۋرەتتەردە فيشينگ كودتارى بار دەگەن جالعان اقپارات كەڭ تاراعان. بۇل مالىمەت شىندىققا جاناسپايتىنى دالەلدەنىپ، رەسمي تۇردە جوققا شىعارىلعان بولاتىن.