ۆولونتەرلەردىڭ ەڭبەگى ءاردايىم جوعارى باعالانۋى كەرەك. بۇل تۋرالى حالىقارالىق ۆولونتەرلەر فورۋمىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz.
«جاناشىرلىق قازاقتىڭ قانىندا بار قاسيەت. حالقىمىز قيىندىققا تاپ بولعان ادامداردان كومەگىن اياماعان. ەل باسىنا كۇن تۋعان قيىن-قىستاۋ ساتتە «ءبىر جەڭنەن قول، ءبىر جاعادان باس شىعارا» بىلگەن. قازاقستانعا جەر اۋدارىلعان تالاي ەتنوس وكىلدەرىن باۋىرىنا باسىپ، بارىن بولىسكەن. سوندىقتان بۇگىنگى جيىننىڭ ماقساتى حالقىمىزدىڭ بولمىسىمەن ۇندەس ەكەنى ءسوزسىز. مەن بۇۇ-نىڭ 75-سەسسياسىندا حالىقارالىق ۆولونتەرلەردى جۇمىلدىرۋ جىلىن جاريالاۋدى ۇسىندىم. بۇل باستاما وسى تاماشا ءداستۇردى ودان ارى دامىتۋ ءۇشىن قاجەت»، - دەدى پرەزيدەنت.
مەملەكەت باسشىسى وتكەن اپتادا تۇركىستان قالاسىندا ۇلتتىق قۇرىلتايدىڭ 2-وتىرىسى وتكەنىن ەسكە سالدى.
«سول جيىندا وتانشىلدىق، ادامگەرشىلىك، ءبىلىمپازدىق، ۇنەمشىلدىك، ەڭبەكقورلىق، جاناشىرلىق سەكىلدى قۇندىلىقتار بارىنەن بيىك تۇرۋعا ءتيىس ەكەنىن اتاپ كورسەتتىم. ادىلەتتى قازاقستاندى ادال ازاماتتار قۇرادى. مەنىڭشە، بارلىق ەرىكتىلەردى ادال ازامات دەۋگە بولادى. ويتكەنى، سىزدەر جاۋاپتى جۇمىس، ساۋاپتى ءىس اتقارىپ جۇرسىزدەر. مەن ۆولونتەرلەردىڭ ەڭبەگى ءاردايىم جوعار باعالانۋى كەرەك دەپ سانايمىن. سول سەبەپتى ەلىمىزدە جىل ۆولونتەرى حالىقارالىق سىيلىعى بەلگىلەندى. بۇل ماراپات بەلسەندى ەرىكتىلەرگە بەرىلەدى. سونىمەن قاتار ەرەن ەڭبەگىمەن كوزگە تۇسكەن ەرىكتىلەر جىل سايىن «شاپاعات» مەدالىمەن ماراپاتتالادى»، - دەدى قاسىم-جومارت توقايەۆ.