قازاقستان پرەزيدەنتىنىڭ بەرىك ۇستانىمىنىڭ ارقاسىندا قىسقا مەرزىمدە ەلدەگى جاعدايدى باقىلاۋعا الۋعا، زاڭدىلىق پەن ءتارتىپتى قالپىنا كەلتىرۋگە مۇمكىن بولدى. بۇل تۋرالى قازاقستان باسشىسى قاسىم-جومارت توقايەۆپەن كەلىسسوزدەردەن كەيىنگى بىرلەسكەن مالىمدەمەدە رف پرەزيدەنتى ۆلاديمير پۋتين ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«قازاقستانداعى قاڭتار وقيعاسىنان كەيىن كوزبە-كوز العاش جۇزدەسىپ وتىرمىز. اتالعان وقيعا مەملەكەتتىڭ ەگەمەندىگىنە، تۇتاستىعىنا جانە تۇراقتىلىعىنا بۇدان بۇرىن بولىپ كورمەگەن سىن-قاتەردى ءتوندىردى. شىن مانىندە، قازاقستان لاڭكەستىك وزبىرلىققا تاپ بولدى، بۇل اگرەسسيا ىشكى ءارى سىرتقى دەسترۋكتيۆتى كۇشتەردىڭ تىكەلەي قاتىسۋىمەن جاسالدى»، - دەدى ۆ. پۋتين.
وسى ورايدا ول قازاقستان پرەزيدەنتى قاسىم-جومارت توقايەۆتىڭ بەرىك ۇستانىمىنىڭ ارقاسىندا قىسقا مەرزىمدە جاعدايدى باقىلاۋعا الۋعا، زاڭدىلىق پەن ءتارتىپتى قالپىنا كەلتىرۋگە، قازاق جەرىنە بەيبىتشىلىكتى قايتارۋعا مۇمكىن بولعانىن جەتكىزدى.
سونىمەن قاتار ۆ. پۋتين ۇجىمدىق قاۋىپسىزدىك تۋرالى شارت ۇيىمى (ۇقشۇ) سىن-قاتەرگە ءتيىمدى ارەكەت ەتۋگە، مۇشە مەملەكەتتەردىڭ قاۋىپسىزدىگى مەن مۇددەلەرىن قورعاۋ ءۇشىن بىتىمگەرلىك كۇشتەردى جۇمىلدىرۋعا قاۋقارلى ەكەنىن كورسەتكەنىن اتاپ ءوتتى.
بۇدان بۇرىن حابارلانعانداي، بۇگىن ماسكەۋدە قازاقستان پرەزيدەنتى قاسىم-جومارت توقايەۆ پەن رەسەي پرەزيدەنتى ۆلاديمير پۋتين جوعارى دەڭگەيدە كەلىسسوز جۇرگىزدى.
ساپار اياسىندا ءبىرقاتار قۇجاتقا قول قويىلدى.