الماتىدا Freedom Holding Corp. قولداۋىمەن ءىىم اكىمشىلىك پوليسيا كوميتەتىنىڭ، Q-88 قازاقستان ۋربانيستەر قاۋىمداستىعىنىڭ جانە Sergek Group كومپانياسىنىڭ ۇيىمداستىرۋىمەن “Vision Zero Almaty” فورۋمى ءوتتى.
ستاتيستيكاعا سايكەس 2015-2022 جىدارى ارالىعىندا ەلدە ورتاشا ەسەپپەن جىلىنا 16 مىڭ جول-كولىك وقيعاسى ورىن الادى، وندا ەكى مىڭنان استام ادام قايتىس بولىپ، 18 مىڭنان استام ادام جاراقات الادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ادامنىڭ ءومىرىن ساقتاپ قالۋ ءۇشىن جاعداي جاساۋ قاجەت نەمەسە قاراپايىم سوزبەن ايتقاندا – قاتەلىكتى كەشىرەتىن جولدار قاجەت. جول ينفراقۇرىلىمىن دامىتۋمەن قاتار زاڭنامانى جانە باقىلاۋ مەن قاداعالاۋدى جۇزەگە اسىرۋ باعىتتارىن وزگەرتۋ كەرەك. ءبىز پارلامەنت ماجىلىسىنە ورتاشا جىلدامدىق تۇسىنىگى، ونى ەسەپتەۋ ءتارتىبى مەن جىلدامدىق اسىرعاندىعى ءۇشىن جاۋاپكەرشىلىككە تارتۋ بويىنشا زاڭناما ۇسىنىستارىن ازىرلەپ، ەنگىزدىك»، – دەدى ءىىم اكىمشىلىك پوليسيا كوميتەتىنىڭ ءتوراعاسى قايسار سۇلتانبايەۆ.
سونىمەن قاتار فورۋمدا ەلەكتروساموكاتتار مەن موپەدتەر ءجۇرىسى، زاڭسىز اۆتوتاسىمالداۋشىلار ماسەلەسى، ەلىمىزدەگى اۆتوتۇراقتار سانىنىڭ قارقىندى ءوسۋى تالقىلاندى. اۆتوكولىكتەردىڭ تەحنيكالىق جاعدايىنا تيىسىنشە باقىلاۋ جۇرگىزىلمەيتىنى دە ەسكەرتىلدى. وسى اتالعان بارلىق فاكتورلار كولىك ءتارتىبىنىڭ تومەن بولۋىمەن قيىنداي تۇسەدى. اعىمداعى جىلدىڭ 10 ايىندا 7 ملن-نان استام جول ءجۇرىسى قاعيداسىن بۇزۋ فاكتىسى انىقتالىپ، شامامەن 19 مىڭ “ماس” جۇرگىزۋشى ۇستالعان، سوت شەشىمى بويىنشا 12،5 مىڭ جۇرگىزۋشى جۇرگىزۋ قۇقىعىنان ايىرىلعان، 19 مىڭ ادام اكىمشىلىك قاماۋعا الىنعان.
«بالالاردىڭ قاتىسۋىمەن 2023 جىلدىڭ 10 ايىندا 3 059 جول-كولىك وقيعاسى تىركەلگەن. ەڭ سوراقىسى – وندا 246 بالا قازا تاۋىپ، 3 368 بالا جاراقات العان. بالالار – ءبىزدىڭ قوعامنىڭ بولاشاعى. سوندىقتان ولاردى بولۋى مۇمكىن قاۋىپتەر تۋرالى حاباردار ەتۋ جانە الدىن الۋ ءبىزدىڭ باسىمدىعىمىز بولۋى كەرەك»، – دەدى ءىىم اكىمشىلىك پوليسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.
ءبىزدىڭ جۇمىسىمىز وسى باعىتتا ەندى باستالماق. ءبىز قازاقستاننىڭ بارلىق جەرلەرىن قامتۋ ءۇشىن جانە قالالارىمىزدى ءقاۋىپسىز ەتۋ ءۇشىن كەلەسى جىلى باسقا وبلىستاردا ءوزارا ءىس-قيمىلدى كەڭەيتۋگە باعىتتالدىق. “Vision Zero Almaty” فورۋمى جول قاۋىپسىزدىگى سالاسىندا يدەيالارمەن، ۇسىنىستارمەن جانە ۇزدىك تاجىريبەلەرمەن الماسۋعا كەرەمەت مۇمكىندىك بەرەدى، – دەدى Q-88 قازاقستان ۋربانيستەر قاۋىمداستىعىنىڭ اتقارۋشى ديرەكتورى ماديار داۋربايەۆ.
ۇيىمداستىرۋشىلار جول اپاتتارىنداعى ءولىم سانى مەن جاراقاتتانۋىشىلار سانىن ازايتۋ ءۇشىن قازاقستاندا Vision Zero شۆەدتىك باعدارلاماسىن ەنگىزۋ بويىنشا باستامانى ۇسىندى. ول جىلدامدىق رەجيمىن تومەندەتۋ، قوعامدىق كولىك جۇرگىزۋشىلەرىن وقىتۋ باعىتتارىن وزگەرتۋ جانە ترافيكتى رەتتەۋ جونىندەگى ءارتۇرلى شارالاردان تۇرادى.