ون كۇنگە سوزىلعان سايىستا الماتى قالاسى ەكىنشى ورىندى يەلەندى
بۇگىن قوستاناي قالاسىندا VII حالىق سپورتى ويىندارى مارەسىنە جەتتى. بۇقارالىق سپورت وليمپياداسى اتالىپ كەتكەن باسەكەدە سوڭعى بولىپ قول كۇرەس پەن شاعىن فۋتبول شەبەرلەرى كىم مىقتىنى انىقتادى، دەپ حابارلايدى Almaty-akshamy.kz.
ون كۇنگە سوزىلعان ويىنداردا قوستاناي وبلىسى جەڭىمپاز اتانسا، الماتى قالاسى - ەكىنشى، نۇر-سۇلتان قالاسى 3-ورىن الدى. توپ جارعان كوماندا مەن جۇلدەگەرلەردى ماراپاتتاۋ راسىمىنە رەسپۋبليكالىق سپورتتى دامىتۋ ديرەكسياسى بۇقارالىق سپورت تۇرلەرى باسقارماسىنىڭ باسشىسى عازيز سەرىكبايەۆ، قوستاناي وبلىسى سپورت جانە دەنە شىنىقتىرۋ باسقارماسىنىڭ باسشىسىنىڭ ورىنباسارى ەلەنا كيرەيەۆا قاتىستى.
«بۇگىندە بۇل كەشەندى باسەكە سپورتتىڭ بۇقارالىق سيپات الۋىنا كوپ ۇلەس قوستى دەۋگە بولادى. ءار وبلىستىڭ، قالانىڭ تۇكپىر-تۇكپىرىندە ىرىكتەۋ ءوتىپ، حالىق اراسىندا كەڭ تانىلىپ ۇلگەردى. بيىل وسى كەزەڭدەردەن سۇرىنبەي وتكەن 1200-دەن استام سپورتشى وسىندا ءوز وبلىسىنىڭ نامىسىن ابىرويمەن قورعادى. تارتىسقا تولى جارىستاردا ەل ىشىنەن شىققان تاڭداۋلى سپورتشى ەكەنىن پاش ەتتى. بۇعان وسىندا جينالعان ءسىز بەن ءبىز كۋا بولدىق.
وسى تۇستا بيىلعى كەشەندى جارىستى جوعارى دەڭگەيدە ۇيىمداستىرعان قوستاناي وبلىسى اكىمدىگىنە، سونىڭ ىشىندە وبلىستىق سپورت باسقارماسىنا ەرەكشە العىس ايتامىن. ەندى 4 جىلدان كەيىن 8ء-شى حالىق سپورتى ويىندارىن تۇركى الەمىنىڭ رۋحاني استاناسى تۇركىستان قابىلدايدى. جاس وبلىس وسى مەجەدەن تۇسپەي، جارىستىڭ مارتەبەسىن ارتتىرا تۇسەدى دەپ سەنەمىز»، - دەدى عازيز سەرىكبايەۆ.
قوستانايدا كەلەسى حالىق سپورتى ويىندارىن قابىلدايتىن ءوڭىر انىقتالدى. ەندى 2026 جىلى كەشەندى دودانى تۇركىستان وبلىسى قابىلداماق. ويىنداردىڭ جابىلۋ راسىمىندە كەزەكتى العان وڭتۇستىك وبلىستىڭ وكىلى جازيرا ءمۇسلىموۆا كەلەسى ويىنداردى وسىلاي جوعارى دەڭگەيدە وتكىزۋگە تىرىساتىندارىن ايتتى. سونداي-اق بۇل تۇركىستان وبلىسىندا بۇقارالىق سپورتتىڭ دامۋىنا ەرەكشە سەرپىن بەرەتىنىنە توقتالىپ ءوتتى.
ايتا كەتەيىك، قوستانايداعى حالىق سپورتى ويىندارىنا 17 كوماندانىڭ 1 200-دەن استام سپورتشىسى قاتىستى. ولار 10 كۇن بويى 9 سپورت ءتۇرى – شاعىن فۋتبول، باسكەتبول (3ح3)، ۆولەيبول (ەرلەر، ايەلدەر)، ۇستەل تەننيسى، قازاق كۇرەسى، اسىق اتۋ، توعىزقۇمالاق، گىر سپورتى مەن قول كۇرەستەن سىنعا ءتۇستى. سونداي-اق ءار وڭىردەن كەلگەن 200-گە جۋىق تورەشى باسەكەلەردىڭ بارىنشا ءادىل وتۋىنە ات سالىستى.
