الماتى وبلىسىنىڭ پروكۋراتۋراسى ەڭبەك زاڭناماسىن ساقتاۋ ماسەلەسى بويىنشا تۇراقتى تۇردە تالداۋ جۇرگىزىپ تۇرادى.
تالداۋ بارىسىندا الماتى وبلىسى بويىنشا «ۆەتەريناريالىق ستانسيا» شجق مكك بيىلعى قاڭتاردا 1 043 قىزمەتكەرگە جالپى سوماسى 223 ملن تەڭگە جالاقى تولەمەگەنى انىقتالدى، دەپ حابارلايدى اlmaty-akshamy.kz.
«پروكۋراتۋرانىڭ قاداعالاۋ اكتىسى بويىنشا قىزمەتكەرلەر الدىنداعى جالاقى تولىعىمەن وتەلدى، جوعارىدا اتالعان ۇيىمنىڭ باسشىسى ق ر اقبتك 87-بابى بويىنشا 150 اەك (553 800 تەڭگە) مولشەرىندە ايىپپۇل سالۋ ارقىلى اكىمشىلىك جاۋاپكەرشىلىككە تارتىلدى، بۇگىنگى كۇنى باسشى كورسەتكەن سومانى وتەدى»، - دەپ جازدى باقىلاۋشى ورگاننان.
سونىمەن قاتار، جالاقىنى ۋاقتىلى تولەمەگەن جاعدايدا ق ر اكىمشىلىك قۇقىقبۇزۋشىلىق تۋرالى كودەكستىڭ 87-بابى، سونداي-اق ق ر قىلمىستىق كودەكسىنىڭ 152-بابى 3-بولىگى بويىنشا جاۋاپكەرشىلىك كوزدەلگەنىن ەسكە سالامىز.