ەلدە كوروناۆيرۋس تارالعالى 13 مىڭ ادام كوز جۇمعان
اۆستريا استاناسىندا كوروناۆيرۋستان قازا تاپقان جانداردى ەسكە الۋ شاراسى وتكىزىلدى، دەپ حابارلايدى Almaty-akshamy.kz حابار 24-كە سىلتەمە جاساپ.
ۆەنانىڭ ورتالىعىنداعى كوشەلەردىڭ بىرىندە وتكەن شاراعا 30 مىڭنان اسا ادام قاتىستى. ازاماتتار قولدارىنا شام ۇستاپ، ۇيالى تەلەفوندارىنىڭ جارىعىن قوسىپ، بىرنەشە مينۋت ءۇنسىز تۇردى. اكسيا مەديسينا قىزمەتكەرلەرىنە دە قولداۋ كورسەتۋ ءۇشىن ۇيىمداستىرىلدى. سەبەبى سوڭعى اپتالاردا ەلدە شەكتەۋ شارالارىنا قارسى شەرۋ بەلەڭ العان. ايتا كەتەيىك، اۆستريادا كوروناۆيرۋس ىندەتى تارالعالى ۆيرۋستان 13 مىڭ ادام كوز جۇمعان.
«ءبىز بۇل شارا ارقىلى كوروناۆيرۋس قۇرباندارىن ەسكە الۋمەن قاتار مەديسينا سالا قىزمەتكەرلەرىنە قولداۋىمىزدى بىلدىرگىمىز كەلەدى. سەبەبى كوروناۆيرۋسقا كۇمانمەن قاراپ، نارازىلىق شەرۋلەرىن وتكىزىپ جاتقاندارعا دا ءبىز ءوزىمىزدىڭ ۇستانىمىمىزدى كورسەتۋىمىز قاجەت»، - شاراعا قاتىسۋشى كلاۋس.