ۆاكسينا العان سوڭ قانشا قازاقستاندىق كوز جۇمدى؟

جالپى، كوروناۆيرۋس ينفەكسياسىنان 4 969 ادام، ونىڭ ىشىندە ۆاكسينا العان 115 ادام قايتىس بولدى.

دەنساۋلىق ساقتاۋ ءمينيسترى الەكسەي سوي ۆاكسينا العاننان كەيىن كوروناۆيرۋستان قايتىس بولعاندار سانىن جاريا ەتتى، – دەپ حابارلايدى almaty-akshamy.kz قازاقپاراتقا سىلتەمە جاساپ.

«جالپى، كوروناۆيرۋس ينفەكسياسىنان 4 969 ادام، ونىڭ ىشىندە ۆاكسينا العان 115 ادام قايتىس بولدى. ياعني، بۇل جالپى قايتىس بولعانداردىڭ 2،5 پايىزى. قايتىس بولعانداردىڭ باسىم بولىگى، 97،7 پايىزى ۆاكسينا الماعاندار. بىزدە وڭىرلەر ىشىندە دە مالىمەتتەر بار. ۆاكسينا العاننان كەيىن قايتىس بولعان ادامداردىڭ سوزىلمالى اۋرۋلارى بولعان. ءدال وسى جايت ولاردىڭ جاي-كۇيلەرىنىڭ ناشارلاۋىنا جانە ومىردەن وزۋىنا سەبەپ بولعان»، – دەدى مينيستر ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.

ونىڭ اتاپ وتۋىنشە، سوزىلمالى اۋرۋلارى بار ازاماتتارعا ۆاكسينا الۋعا كەڭەس بەرىلەدى. ويتكەنى، ولار قاتەر تونەتىن توپقا جاتادى.

«ءبىراق، تاعى دا قايتالاپ ايتقىم كەلەدى، قايتىس بولعان ازاماتتاردىڭ باسىم بولىگى ۆاكسينا الماعان. كۇردەلى اۋرۋلاردىڭ بارلىعى سەمىزدىك، قانت ديابەتى، جۇرەك-قان تامىر جۇيەسىندەگى، تىنىس الۋ جۇيەسىندەگى اۋرۋلارعا بايلانىستى»، – دەدى ول.