V دۇنيەجۇزىلىك كوشپەندىلەر ويىندارىنىڭ جابىلۋ سالتاناتى «ەتنواۋىل» ۇلتتىق-مادەني كەشەنىندە وتەدى

2024 جىلعى 13 قىركۇيەك كۇنى ساعات 16:00-دە مادەنيەت جانە اقپارات مينسترلىگىنىڭ ۇيىمداستىرۋىمەن «ەتنواۋىل» ۇلتتىق-مادەني كەشەنىندە V دۇنيەجۇزىلىك كوشپەندىلەر ويىندارىنىڭ جابىلۋ سالتاناتى وتەدى، دەپ حابارلايدى aqshamnews.kz.

دۇنيەجۇزىلىك كوشپەندىلەر ويىندارى كوشپەلى حالىقتاردىڭ ەتنيكالىق سپورتى مەن مادەني مۇراسىن ناسيحاتتاۋ ماقساتىندا قۇرىلدى. العاشقى ويىندار 2014 جىلى چولپون-اتادا (قىرعىز رەسپۋبليكاسى) ءوتتى. سودان بەرى كوشپەلىلەر مادەنيەتىنىڭ جاھاندىق ماڭىزىن ايقىنداعان شارا ەكى جىل سايىن وتكىزىلىپ كەلەدى.

V دۇنيەجۇزىلىك كوشپەندىلەر ويىندارىنىڭ جابىلۋ سالتاناتى بارىسىندا، استانا قالاسىنىڭ تۇرعىندارى مەن قوناقتارى قۇرمەتىنە قازاقستاننىڭ ەڭبەك سىڭىرگەن قايراتكەرلەرى، حالىقارالىق جانە رەسپۋبليكالىق كونكۋرستاردىڭ لاۋرەاتتارى جانە تانىمال قازاقستاندىق ەسترادا جۇلدىزدارى ونەر كورسەتەدى.

اتاپ ايتساق، قازاقستاننىڭ ەڭبەك سىڭىرگەن قايراتكەرلەرى: قاراقات ءابىلدينا، قايرات باەكەنوۆ، گۇلسىم مىرزابەك، حالىقارالىق جانە رەسپۋبليكالىق كونكۋرستاردىڭ لاۋرەاتتارى: مارات ايتىمباي، مادي سىزدىقوۆ جانە ت.ب. ونەر جۇلدىزدارى تانىمال ەسترادالىق اندەر مەن حالىق كومپوزيتورلارىنىڭ شىعارمالارىن ورىندايدى.

بۇدان باسقا، «ناز» مەملەكەتتىك بي تەاترى جانە ەركەعالي راحمادييەۆ اتىنداعى مەملەكەتتىك اكادەميالىق فيلارمونياسى، «قامبارقان» فولكلورلى-ەتنوگرافيالىق ءانسامبلى (قىرعىز رەسپۋبليكاسى) جانە «مەلومەن» توبى قاتىسادى.