تۇرعىندار ءوز باسپاناسىن تاستاپ كەتۋگە ءماجبۇر
الماتى وبلىسىنىڭ ۇزىناعاش اۋىلىندا 50-گە جۋىق ءۇيدىڭ اۋلاسىن سۋ الىپ، كەي باسپانانىڭ قابىرعاسى اجىراعان، دەپ حابارلايدى Almaty-akshamy.kz Almaty.tv-گە سىلتەمە جاساپ.
قىس اياعى قىجالات بولدىق دەگەن ءدۇيىم ەل بيلىك وكىلدەرى ءالى كەلىپ كومەك بەرمەدى دەپ وتىر. 50 مىڭعا جۋىق حالقى بار ۇزىناعاشتا بۇل جاعداي جىلدا قايتالانادى دەيدى جۇرت.
قىزىل سۋ تۇرعىنداردى ابىگەرگە سالعالى ايدان اسىپتى. ءتىپتى باسپاناسىن تاستاپ كەتۋگە ءماجبۇر بولعاندار بار. ءتورت بالانىڭ اناسى تاڭنۇر تۇرلىبايەۆا ءقازىر پاتەر جالداۋىما تۋرا كەلدى دەيدى.
«مەنىڭ ءۇيىمدى 4 جىلدان بەرى سۋ باسىپ كەلەدى. ءۇيدىڭ ىرگەتاسى اجىراپ، كىرپىشتەرى اشىلىپ، قۇلايىن دەپ تۇر»، – دەيدى ۇزىناعاش اۋىلىنىڭ تۇرعىنى تاڭنۇر تۇرلىبايەۆا.
تىرنەكتەپ تاۋىپ، قازىعىن قاعىپ سالعان تامدى ساتۋعا دا قويدىم. ءبىراق ءۇيدى كورۋگە كەلگەندەر سىرتىنان-اق تەرىس اينالادى دەيدى.
«اكىمدىك بىزگە قالاي دا شەشىمىن تاۋىپ بەرسىن. بالالارعا وبال بولدى، كەشە بالام سۋ بولىپ كەلدى. كيىمىن قاشانعى كەپتىرە بەرەمىز، بالام اۋىراتىن بولدى»، – دەيدى ۇزىناعاش اۋىلىنىڭ تۇرعىنى قۇرالاي ءپىشايىنوۆا.
ۇزىناعاش حالقى بۇل ماسەلەنى مەڭزەپ، بيلىكتەن كومەك سۇراعالى دا جىلدار بولعان ەكەن. اكىمدىك وكىلدەرى دە سۋ باسقان ۇيلەردىڭ بارىن راستايدى. الايدا الدىن الۋ شاراسىنىڭ جۇرگىزىلمەۋىن بىلاي دەپ سىلتاۋراتىپ وتىر.
«وسى كۇنگە دەيىن تازارتىلماعان. جەردىڭ بەتى توڭ بولعاندىقتان، تەحنيكا جەردى قازۋ جۇمىستارىن جۇرگىزە المادى. سونىڭ سالدارىنان وسىنداي جاعدايعا تاپ بولدىق»، – دەيدى جامبىل اۋدانى اكىمىنىڭ ورىنباسارى ابزال نۇرپەيىسوۆ.
بۇگىندە ەلۋ مىڭ حالقى بار ەلدى مەكەنگە وبلىستىق قۇتقارۋ قىزمەتى، اسكەري قىزمەتكەرلەردى قوسقاندا جۇزگە تارتا جۇمىسشىلار اپاتتىڭ الدىن الۋ ءۇشىن جۇمىلدىرىلعانىن ايتادى اۋىل اكىمى.
«ءار تۇرعىنعا توتەنشە جاعداي تۋرالى ەسكەرتىلدى. ۇيلەردى سۋ باسقان جوق، تەك اۋلانى عانا باستى. ساراپتاما جاساپ جاتقانىمىزعا 15 كۇن بولدى»، – دەدى ۇزىناعاش اۋىلدىق وكرۋگىنىڭ اكىمى باقىت بەيسەنبەكوۆ.
بۇگىندە ۇزىناعاش اۋىلدىق وكرۋگى بويىنشا 10 شاقتى ءىرى تەحنيكا، 5 موتوسورعىش، 2 ەكسكاۆاتور ارىق ارنالارىن اشۋعا كىرىسىپتى. الايدا ەرىگەن قار سۋىنىڭ مولشەرى كوپ بولعاندىقتان، ۇلگەرمەي جاتىرمىز دەپ سەندىردى.