كونكۋرس قورىتىندىسى بويىنشا بارلىعى 64 جەڭىمپاز انىقتالادى.
قازاقستان ۇستازدارى اراسىندا ءوتىپ جاتقان بايقاۋدىڭ فينالىنا قانشا مامان شىققانى بەلگىلى بولدى، دەپ حابارلايدى Almaty-akshamy.kz.
«2022 جىلعى «ۇزدىك پەداگوگ» اتاعىنا 123 ءمۇعالىم ۇمىتكەر. ولار بايقاۋعا قاتىسۋشى 5،5 مىڭ پەداگوگتىڭ اراسىنان ىرىكتەلىپ الىندى. كونكۋرس قورىتىندىسى بويىنشا بارلىعى 64 جەڭىمپاز انىقتالادى. ولاردىڭ بارلىعى 3 ملن تەڭگەدەن (1 000 اەك) سىياقى الادى»، - دەلىنگەن وقۋ-اعارتۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
بيىل مينيسترلىك سيفرلاندىرۋ بويىنشا اۋقىمدى جۇمىس جۇرگىزدى. دالىرەك ايتقاندا، بايقاۋدىڭ بارلىق كەزەڭى، ياعني قاتىسۋشىلاردى تىركەۋدەن باستاپ، رەسپۋبليكالىق كەزەڭنىڭ قورىتىندىسىن شىعارۋعا دەيىن تولىعىمەن سيفرلاندىرىلدى. سونىڭ ارقاسىندا تۇسكەن وتىنىشتەر سانى رەكوردتىق كورسەتكىشكە (5،5 مىڭنان استام) جەتتى.
ءقازىر بايقاۋدىڭ اقتىق سىنىنا بالاباقشالار مەن مەكتەپتەردىڭ 103 ءمۇعالىمى، كوللەدجدەردىڭ 20 ءمۇعالىمى قاتىسىپ جاتىر. ولار اۋداندىق، قالالىق جانە وبلىستىق تۋرلاردىڭ قورىتىندىسى بويىنشا ۇسىنىلعان.
«بيىل العاش رەت وتىنىمدەردى قابىلداۋ، تىركەۋ، كونكۋرس قۇجاتتارىن تاپسىرۋ، باعالاۋ جانە اپەللياسيا بەرۋ teachercontest.iac.kz پورتالىندا جۇزەگە اسىرىلىپ جاتىر. سونداي-اق ءوتىنىم بەرىلگەن ساتتەن باستاپ بارشا ۇمىتكەر ونلاين رەجيمدە بايقاۋدىڭ بارلىق ديناميكاسىن باقىلاۋ مۇمكىندىگىنە يە بولدى. ياعني قاتىسۋشىلار قاي كەزەڭدە، ولارعا ساراپشىلار قانداي ۇپاي بەردى جانە ت.ب. باقىلاي الدى. بيىلدىڭ تاعى ءبىر جاڭالىعى – ارىپتەستەرىمىز كونكۋرس كوميسسياسى باعالايتىن اشىق ساباقتار وتكىزەدى. جۇلدە قورىن دا كوبەيتتىك. وسىنداي شارالاردىڭ ارقاسىندا قاتىسۋشىلار سانى عانا ەمەس، ولاردىڭ ساپالىق قۇرامى دا ارتىپ كەلەدى»، - دەيدى وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى گۇلميرا كارىموۆا.
رەسپۋبليكالىق كونكۋرس كوميسسياسىنىڭ قۇرامىندا قوعامدىق بىرلەستىكتەردىڭ، ۇكىمەتتىك ەمەس ۇيىمداردىڭ، اتا-انالار قاۋىمىنىڭ وكىلدەرى، جۋرناليستەر، بەلسەندى پەداگوگتەر، ءبىلىم جانە عىلىم قىزمەتكەرلەرىنىڭ قازاقستاندىق سالالىق كاسىپوداق ۇيىمىنىڭ وكىلدەرى جانە ت.ب. بار.
«ۇزدىك پەداگوگ» رەسپۋبليكالىق كونكۋرسى 2012 جىلدان بەرى وتكىزىلىپ كەلە جاتقانىن اتاپ وتەيىك. وسى ۋاقىت ارالىعىندا مەكتەپكە دەيىنگى جانە ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ 600-گە جۋىق ءمۇعالىمى «ۇزدىك پەداگوگ» اتاعىنىڭ يەگەرى اتاندى.