قازاقستاننىڭ ءار وبلىسىنداعى ۇزدىك اۋىلدار تۋرالى كىتاپ جارىق كوردى
«ۇزدىك 30 اۋىل» انىقتامالىق البومى يدەياسىنىڭ اۆتورى مۇراتحان شوقان جاز بويى ەلىمىزدىڭ بارلىق وبلىسىنان ماتەريال جيناپ، جيناقتى جارىققا شىعارعان. قازاقستان جازۋشىلار وداعىنىڭ مۇشەسى «ءار اۋىلدان شىققان ازاماتتار ءوڭىردىڭ دامۋىنا ۇلەس قوسىپ وتىر» دەيدى. اتالعان كىتاپقا ەلدىڭ بارلىق وبلىسىنان 2-3 ۇزدىك اۋىل ەنگەن. جالپى، تاۋەلسىزدىگىمىزدىڭ 30 جىلدىعىنا وراي تەك 30 اۋىل عانا ىرىكتەلىپ الىنعان، دەپ حابارلايدى Almaty-akshamy.kz
«ءبىرىنشى ماقسات - جەتىستىكتى كورسەتۋ بولسا، ەكىنشى ماقسات - سول اۋىلداردى كوركەيتۋگە ولشەۋسىز ۇلەس قوسىپ وتىرعان كاسىپكەر ازاماتتاردى كورسەتۋ. مەن ءبىر اي بويى اۋىلداردى ارالاعان كەزدە كوردىم. تۋعان جەرگە تۋىن تىگىپ، اۋىلىنا بار اقشاسىن، قاراجاتىن سالىپ، سول اۋىلدىڭ قازانىن قايناتىپ وتىرعان مىقتى ازاماتتار بار»، – دەيدى قازاقستان جازۋشىلار وداعىنىڭ مۇشەسى مۇراتحان شوقان.
انىقتامالىق البومدا اۋىلدىڭ تاريحى مەن ونداعى الەۋمەتتىك نىساندار قامتىلعان. ال اۋىلدان شىققان تۇلعالار دەگەن بولىمدە ەلدى مەكەندى كوركەيتىپ وتىرعان جاندار تانىستىرىلعان. پارلامەنت سەناتىنىڭ دەپۋتاتى نۇرتورە ءجۇسىپ كەلەشەكتە بۇل جوبانىڭ اۋقىمىن كەڭەتۋ كەرەك دەيدى. تەك 30 اۋىل عانا ەمەس، 300 اۋىلعا جەتسە، نۇر ۇستىنە نۇر بولادى دەگەن تىلەگى بار.
«قازاقستان الەۋەتى، قازاقستاننىڭ مۇنايى، قازاقستاننىڭ استىعى، قازاقستاننىڭ التىنى، كۇمىسى دەپ جاتامىز. سول سياقتى قازاقستان اۋىلدارى دا ۇزدىك بولۋى كەرەك. كەمشىلىگى جوق اۋىل بولمايدى، البەتتە. دەگەنمەن، كەي اۋىلدا بارلىق ءتيىستى جاعدايلار جاسالعان، باسسەينگە دەيىن بار. ماسەلەن، قىزىلوردا وبلىسىنداعى اۋىلدا اۋدان ورتالىعىنا بەرگىسىز كەرەمەت ساۋدا ءۇيى، جاستار اللەياسى بار»، – دەدى، ق ر پارلامەنتى سەناتىنىڭ دەپۋتاتى نۇرتورە ءجۇسىپ.
سالتاناتتى جيىنعا قاتىسقاندار اۋىلداردىڭ جاعدايىن ەلەپ، ونىڭ عاجايىپتارىنىڭ قالا ومىرىنەن كەم تۇسپەيتىنىن دارىپتەۋدە مۇنداي جوبالاردىڭ ىقپالى زور ەكەنىن ايتىپ تارقاستى.