الماتىدا «Air Astanaنىڭ وپەراسيالىق قىزمەتى: ماسەلەلەر جانە دامۋ جوسپارلارى» اتتى بريفينگ ءوتتى.
جيىن بارىسىندا Air Astana اۋە كومپانياسىنىڭ پرەزيدەنتى پيتەر فوستەر بارلىق باستى قىزمەتكەرلەرىمەن بىرگە بۇگىنگى كۇنى ورىن الىپ جاتقان قيىندىقتاردىڭ سەبەبىن ءتۇسىندىرىپ، ب ا ق وكىلدەرىنىڭ سۇراقتارىنا جاۋاپ بەردى.
كومپانيا پرەزيدەنتىنىڭ ايتۋىنشا، سوڭعى ۋاقىتتا ورىن العان اۋە رەيستەرىنىڭ كەشىگۋى، ۇشۋ كەستەسىنىڭ ساقتالماۋى سىندى قولايسىزدىقتارعا ىشكى جاعدايدان بولەك، جالپى الەمدەگى وزگەرىستەر اسەر ەتۋدە. حالىقارالىق اۋە كولىگى قاۋىمداستىعىنىڭ مالىمەتىنشە، جولاۋشىلار سانىنىڭ ارتۋى الەمدەگى ەڭ ءىرى اۋەجايلاردا كولىك داعدارىسىنا جانە حالىقارالىق اۋە كومپانيالارىنىڭ رەيستەرىنىڭ كەشىگۋىنە اكەلدى. مۇنداي جاعدايعا Air Astana-دا تاپ بولعان، جازدىڭ العاشقى ەكى ايىندا وتكەن جىلمەن سالىستىرعاندا، جولاۋشىلار سانى 17%-عا ارتقان. سونداي-اق، اۋە كومپانياcىنىڭ ۇشاقتارى ءىرى توراپتى اۋەجايلارعا ۇشاتىندىقتان، حالىقارالىق حابتارداعى ىركىلىستەر كومپانيا كەستەسىنە اسەر ەتكەن. جاعدايدى ۋشىقتىراتىن فاكتورلار قاتارىندا قازاقستان اۋەجايلارىنداعى ۇشۋ-قونۋ جولاقتارىن جوندەۋ، قاربالاس مەرزىم كەزىندە اۋەجايلاردىڭ جابىلۋى جانە قۇستارمەن سوقتىعىسۋدىڭ كوبەيۋى سىندى سەبەپتەر اتالدى. ناقتى ايتقاندا، قۇستارمەن سوقتىعىسۋ سانى وتكەن جىلمەن سالىستىرعان-دا 22،3%-عا وسكەن.
دەگەنمەن Air Astana بارلىق كىنانى سىرتقا ارتىپ قويماي، وزدەرىنەن كەتەتىن ولقىلىقتار بارىن مويىندادى. اۋە كومپانياسىنىڭ ۇقىپتىلىق كورسەتكىشى (كەستە بويىنشا ۋا-قىتىلى ۇشىپ-قونۋى) 2015-2016 جىلدارى 92-91% بولسا، ودان كەيىن بۇل كورسەتكىش تومەندەي بەرگەن. 2018-دە 86%، 2020 مەن 2021-دە 85%، بيىل جارتى جىلدىق كورسەتكىش بويىنشا 74%-دى قۇرادى. اسىرەسە، جازعى ۋاقىتتا رەيستەردىڭ كەستەسى ءجيى بۇزىلعان. ناۋرىز ايىندا جولاۋشىلاردىڭ 87% ۋاقىتىلى جولعا اتتانسا، ماۋسىم مەن شىلدەدە بۇل كورسەتكىش 66%-دى عانا كورسەتكەن.
«Air Astanaنىڭ بۇكىل كومانداسى رەيستەردى ۋاقىتىلى ورىنداۋ ءۇشىن جۇمىس ىستەيدى. كەشىگۋلەر سانىن ازايتۋ ءۇشىن جانە قىزمەت كورسەتۋ ساپاسىن ارتتىرۋ ءۇشىن ءبىز رەيستەر سانىن قىسقارتىپ، Airbus A320 رەزەرۆتىك ۇشاعىن بولدىك. سونداي-اق، رەيستەردىڭ كەشىگۋىنە بايلانىستى جەدەل جەلى اشتىق. جولاۋشىلار ساعات 8.00-دەن 24.00-گە دەيىن +7 (7272) 44-44-78 نومىرىنە حابارلاسا الادى»، – دەدى Air Astana كومپانيالار توبىنىڭ پرەزيدەنتى پيتەر فوستەر.
سونىمەن قاتار، كومپانيا باسشىلىعى 2022 جىلدىڭ سوڭىنا دەيىن Air Astana اۆيا-پاركى ءۇشىن 2 ۇشاق، FlyArystan فلوتى ءۇشىن 3 ۇشاق ساتىپ الۋدى جوسپارلاپ وتىرعانىن حابارلادى. 2020 جىلدىڭ ورتاسىنان 2022 جىلدىڭ ناۋرىز ايىنا دەيىن فلوتتى 13 ۇشاق تولىقتىرعان. 2025 جىلعا دەيىن تاعى 24 اۋە كەمەسىن الۋ جوسپارلانعان.
بريفينگ بارىسىندا ەلوردادا قۇنى 10،4 ميلليون اقش دوللارىن قۇرايتىن ۇشقىشتار مەن بورتسەرىكتەردى وقىتۋ ءۇشىن ارنايى جاڭا وقۋ ورتالىعى سالىناتىنى ايتىلدى.