بيىل الماتى وبلىسى «ءۇشارال-دوستىق» باعىتىنداعى اۆتوماگيسترالدىڭ 120 شاقىرىمى سالىنىپ بىتەدى.
«ءۇشارال -دوستىق» تاس جولىنىڭ جوندەۋ جۇمىستارى 2022 جىلى اياقتالادى، دەپ حابارلايدى Almaty-akshamy.kz 24.kz-كە سىلتەمە جاساپ.
بۇگىنگى كۇنگە دەيىن ەكى مەردىگەر مەكەمە جولدىڭ 70 كيلومەتردەن استامىن پايدالانۋعا بەرگەن. ياعني الاكول اۋدانىنىڭ ورتالىعىنان اقشي جانە كوكتۇما اۋىلىنا دەيىنگى ارالىقتا كولىك قاتىناسىنا رۇقسات ەتىلىپ وتىر. قازاقستان مەن قىتايدى جالعايتىن 183 شاقىرىم كۇرە جولعا جارتى عاسىر بۇرىن اسفالت توسەلگەن بولاتىن. ابدەن ەسكىرگەن سوڭ، 2019 جىلى جول قۇرىلىسى قولعا الىندى. الايدا بىلتىر ىندەتتىڭ ورشۋىنە بايلانىستى جۇمىس قارقىنى تومەندەگەن. مامان تاپشىلىعى بايقالىپ، كەستەدەن قالعان. ال بيىل جاعداي تۇراقتالدى دەيدى جاۋاپتىلار.
نۇرحات اقىلتايەۆ، «قازاۆتوجول» ۇك وبلىستىق فيليالى باسشىسىنىڭ ورىنباسارى: – قازىرگى تاڭدا جۇمىس كەستەسىنە ساي جۇمىس ىستەپ جاتىرمىز. وسىعان جەتۋ ءۇشىن كۇندىز-تۇنى جۇمىس جاسادىق. تۇندە قاجەتتى ماتەريالداردى تاسىپ، كۇنى بويى جۇمىس جاساپ، قوسىمشا سۋبارەنداعا مەردىگەرلەردى شاقىرتىپ، قوسىمشا ارەنداعا تەحنيكالار شاقىرىپ، كەستەدەن قالعان پروبلەمامىزدى جويدىق. جانە دە بارلىق جۇمىستار كەلىسىمشارتتىڭ مەرزىمىندە جوسپارعا سايكەس اياقتالادى.