الماتىدان اتىراۋعا ۇشقان ۇشاق كوتەرىلگەننەن كەيىن 15 مينۋتتان سوڭ اۋەجايعا ورالدى: جولاۋشىلاردىڭ ءبىرى جەدەل ميوكارد ينفاركتىن العان.
ۇشاق جەرگە قونعاننان كەيىن ەر ادام جەدەل جاردەم دارىگەرلەرىنە تاپسىرىلىپ، شۇعىل تۇردە الماتى №4 قالالىق كلينيكالىق اۋرۋحاناسىنا جەتكىزىلدى.
«ناۋقاستىڭ جاعدايى وتە اۋىر دەپ باعالاندى، كارديوگەندىك شوك ورىن الىپ، قان قىسىمى تومەندەدى، قاتتى ەنتىگۋ، اۋىرسىنۋ بايقالدى. وعان شۇعىل جاسالعان كورونارلىق انگيوگرافيادا ءۇش تامىردىڭ زاقىمدانعانى انىقتالدى. جۇرەك قانمەن ءۇش نەگىزگى ارتەريا ارقىلى قامتاماسىز ەتىلەدى. ەكى كورونارلىق ارتەريا، وڭ جاق كورونارلىق ارتەريا جانە وراي جاناسپا ارتەريا تولىعىمەن جابىلعان. الدىڭعى قارىنشا ارالىق ارتەريانىڭ تارىلۋى 96% بولدى. بىلايشا ايتقاندا، جۇرەكتىڭ قانمەن قامتاماسىز ەتىلۋى 4% عانا بولدى. مۇنداي جاعدايدا اشىق اورتا-كورونارلىق شۋنتتاۋ وتاسىن جاساۋ قاجەت. سوندىقتان ناۋقاستى كوپبەيىندى تەكسەرۋدى، الماتى قالالىق كارديولوگيالىق ورتالىق ماماندارىمەن كەڭەيتىلگەن كونسيليۋم ۇيىمداستىردىق. ناۋقاستى اشىق وتا جاساۋ ءۇشىن باسقا اۋرۋحاناعا اۋىستىرۋ كەرەك دەپ شەشىلدى. ءبىراق 1-1،5 ساعات ىشىندە ناۋقاستا ايقىن جۇرەك جەتكىلىكسىزدىگى پايدا بولىپ، ونى باسقا اۋرۋحاناعا جەتكىزۋ ۇلكەن ءقاۋىپ تۋعىزدى. الدىڭعى قارىنشااە ارالىق ارتەرياعا ستەنت قويۋدان باسقا امال بولمادى. ستەنتتەۋ ءساتتى ورىندالدى. قازىرگى ۋاقىتتا ناۋقاستىڭ جاعدايى قاناعاتتانارلىق، ءۇش كۇن جانساقتاۋ بولىمىندە جاتتى»، - دەيدى №4 قالالىق كلينيكالىق اۋرۋحانانىڭ رەنتگەن-ەندوۆاسكۋليارلىق حيرۋرگيا جانە كارديولوگيا ءبولىمىنىڭ مەڭگەرۋشىسى اسقار نارىنبايەۆ.
«التىن ساعات» ءپرينسيپى بويىنشا دۇرىس قابىلدانعان شەشىمدەر تىزبەگى: ۇشاقتى قايتارۋ، تاسىمالداۋ كەزىندە اۋرۋحاناعا دەيىنگى كەزەڭدە جەدەل مەديسينالىق كومەك بريگاداسىنىڭ كاسىبي ىس-ارەكەتى جانە №4 قالالىق كلينيكالىق اۋرۋحانا جاعدايىندا شۇعىل حيرۋرگيالىق ارالاسۋ ارقاسىندا ناۋقاس امان قالدى.
«بۇل جاعدايدا بورت كەرى قايتارىلماعاندا، اتىراۋعا ۇشۋ ۋاقىتى ءۇش ساعات جانە وسى ءۇش ساعات ىشىندە كەز كەلگەن ۋاقىتتا جۇرەك توقتاپ، ناۋقاس قايتۋى مۇمكىن ەدى»، - دەيدى №4 قالالىق كلينيكالىق اۋرۋحانانىڭ رەنتگەن-ەندوۆاسكۋليارلىق حيرۋرگيا جانە كارديولوگيا ءبولىمىنىڭ مەڭگەرۋشىسى اسقار نارىنبايەۆ.
ەر ادام وتادان ايىعىپ، وڭالتۋدى جالعاستىرادى. جانساقتاۋ بولىمىندەگى ءۇش كۇن جانە كارديولوگتاردىڭ ءجىتى باقىلاۋىنداعى ءبىر اپتا ارتتا قالدى. 2024 جىلدىڭ 13 تامىزى جاقسىلىق يعجانوۆتىڭ ەكىنشى تۋعان كۇنى. ايتپاقشى ول دا ۇشقىش، زەينەتكەرلىككە شىققانشا شاعىن اۆياسيادا جۇمىس ىستەگەن. كومانديردىڭ ۇشاقتى اۋەجايعا قايتارۋ شەشىمى ارقاسىندا جاقسىلىق امان قالدى.