ساۋد ارابياسىنداعى قاجىلىقتان ەلگە ورالىپ كەلە جاتقان ۇشاقتا پاۆلودارلىق ازاماتتىڭ دەنساۋلىعى كۇرت ناشارلاپ، اللەرگيالىق اۋرۋ پايدا بولعان. ول تۇماۋعا قارسى پرەپاراتتى قابىلداپ، ۇيىقتاپ كەتكەن. اراعا ءبىر ساعات سالىپ، بەت-اۋزى ءىسىپ ويانعان.
بىلىكتى دارىگەر جايلى دسم سايتى جاريالادى، دەپ حابارلايدى aqshamnews.kz.
بورتسەرىك قىز ۇشاق ىشىندەگى جولاۋشىلارعا شۇعىل دارىگەر قاجەت ەكەنىن حابارلاعان. ءدال سول ۋاقىتتا ۇشاقتا بولعان جەتىسۋ وبلىسىنىڭ دارىگەرى جاننۇر سىرىموۆ ناۋقاسقا بىردەن العاشقى كومەك كورسەتۋدى باستاپ كەتكەن.
جولاۋشى مۇرات يمانعازينوۆتىڭ ايتۋىنشا، بۇل ۋاقىتتا شامامەن قاپ تاۋلارىنىڭ ۇستىندە ۇشىپ كەلە جاتقان.
«ەكيپاج شۇعىل جاعداي بولسا، ۇشاقتى جاقىن ماڭداعى اۋەجايدىڭ بىرىنە قوندىرامىز دەگەن شەشىم قابىلداعان. ءبىراق جاننۇر ماۋلەن ۇلى ءوز ءىسىنىڭ كاسىبي مامانى ەكەنىن ايتىپ، امان-ەسەن جەتكىزدى. ومىرىمە اراشا تۇسكەن ابزال جانعا شەكسىز ريزاشىلىعىمدى ايتقىم كەلەدى»، - دەيدى مۇرات يمانعازينوۆ.
جاننۇر سىرىموۆ بۇگىندە جەتىسۋ وبلىسى، كوكسۋ اۋداندىق اۋرۋحاناسىنىڭ باس دارىگەرى بولىپ قىزمەت اتقارادى. سول ساپارىندا مەككەگە مۇگەدەك اكەسىن قاجىلىققا اپارىپ، قايتىپ كەلە جاتقان بەتى ەكەن.
«ناۋقاسقا ومىرىمدە اۋەدە مەدسينالىق كومەك كورسەتەم دەگەن وي بولماپتى. اكەمە ۇنەمى ەم-دوم جاساپ جۇرەتىندىكتەن، جانىمدا دارى-دارمەك قوبديشاسىن ۇستايتىنمىن. بورتسەرىك قىزدىڭ حابارلاۋىنان سوڭ ناۋقاس اعانىڭ جانىنا جەدەل بارىپ قاراسام، كوزىنىڭ اينالاسى مەن بەتى ىسىنە باستاعان. مۇنى مەديسينا تىلىندە «كۆينكە ءىسىنۋى» دەپ اتايدى. ەگەر 15-20 مينۋت ىشىندە ادامعا مەديسينالىق كومەك كورسەتىلمەسە، ءولىپ كەتۋى ىقتيمال. بىردەن «اللەرگوپرەسس» جانە «پرەدنيزولون» پرەپاراتتارىن ەكتىم. ودان سوڭ قان قىسىمىن ولشەپ، ءتىلىنىڭ استىنا تابلەتكا سالدىم. سيستەما سالۋدى دا باستاپ كەتتىم»، - دەدى جاننۇر سىرىموۆ.
جاننۇر ماۋلەن ۇلى مەديسينا سالاسىنداعى العاشقى قىزمەتىن سانيتارلىق فەلدشەر بولىپ باستاعان. كوكسۋ اۋدانىنداعى قىزمەتىنە دەيىن الماتىداعى سىزعانوۆ اتىنداعى ۇلتتىق عىلىمي حيرۋرگيا ورتالىعىندا بۇيرەك ترانسپلانتولوگياسى، ۋرولوگيا جانە ەكستراكورپورالدى دەتوكسيكاسيا بولىمشەسىنىڭ مەڭگەرۋشىسى، تالدىقورعان قالاسىندا اۋرۋحانا باسشىسىنىڭ ورىنباسارى بولىپ ەڭبەك ەتكەن.