ۇكىمەت وتىرىسىندا Air Astana پرەزيدەنتى پيتەر فوستەر ۇشاق بيلەتىنىڭ باعاسى قالاي ەسەپتەلەتىنىن جانە بيلەتتى قالاي ارزانىراق ساتىپ الۋعا بولاتىنىن ايتىپ بەردى، دەپ حابارلايدى Almaty-akshamy.kz.
ول Fly Arystan-داعى باعا بەلگىلەۋ سەرپىندى ەكەنىن جانە مۇنداي تاجىريبەنى بارلىق الەمدىك تاسىمالداۋشى قولداناتىنىن ايتتى.
«باعانى، تاريفتەردى، ءبىز ايتاتىن 13 قوسالقى كلاستى نارىق بەلگىلەيدى. بۇل نەنى بىلدىرەدى؟ بىرەۋ بيلەتتى ەرتەرەك برونداسا، ساتىپ السا، ءبىز سوعۇرلىم تومەن تاريف ۇسىنا الامىز. سونىمەن قاتار ساتىپ العان كۇنگە دە بايلانىستى. جوسپارلاۋ ۋاقىتىنا دا بايلانىستى. ەگەر بيلەت جۇما ءتۇنى سۇرانىستىڭ جوعارى ساتىندە الىنسا، ارينە، تاريف جوعارىراق بولادى. ءبىراق بۇل شىعىنعا بايلانىستى باعا مودەلى ەمەس. بۇل تەك نارىققا، سۇرانىسقا بايلانىستى ديناميكا. بۇل ستاندارتتى حالىقارالىق تاريف ساياساتى، بۇكىل الەمدە قولدانىلادى جانە تەك نارىققا تاۋەلدى»،-دەيدى Air Astana پرەزيدەنتى.
ونىڭ ايتۋىنشا، Fly Arystan سۇرانىس از كەزدە شىعىنعا باتادى. ويتكەنى بيلەت باعاسى تومەندەيدى. ال كومپانيا قىزمەتكەرلەرىنىڭ جالاقىسى بۇرىنعىسىنشا قالادى.
«ءبىراق سۇرانىس جوعارى بولعان كەزدە، تاريفتەر دە جوعارى بولىپ، تاسىمالداۋشىنىڭ پايدا تابۋىنا مۇمكىندىك بولادى»، - دەدى پيتەر فوستەر.
كومپانيا پرەزيدەنتى تاريفكە نەگىزدەلگەن ساياسات ماسەلەسى جۇرتشىلىقتىڭ كوپ نازارىن اۋدارىپ، كوپ سۇراق تۋعىزاتىنىنا كەلىستى. ءبىراق، ونىڭ ايتۋىنشا، اۆياكومپانيا ءوزى جۇمىس ىستەيتىن جاعدايدا قولدان كەلگەننىڭ ءبارىن جاساپ جاتىر.
«ءبىز كۇشتى ينفلياسيالىق قىسىممەن جۇمىس ىستەپ جاتىرمىز. دەگەنمەن جول ءجۇرۋ اقىسىن بارىنشا تومەن ۇستاۋ ءۇشىن بارلىق شارانى قولدانىپ جاتىرمىز. ىشكى تاريفتەردە ەشقانداي قوزعالىس نەمەسە وزگەرىس جاساعان جوقپىز. Fly Arystan ىشكى تاريفتەردىڭ 54%-ىن 14 000 تەڭگەدەن تومەن ساتادى. Air Astana 47%-ىن 20 000 تەڭگەدەن تومەن ساتادى. نەگىزى Fly Arystan-نىڭ بىلتىر ساتقان ورتاشا تاريفتەرىنە قاراساڭىز، بارلىعى 49 دوللار. Fly Arystan اشىلعانعا دەيىن 2019 جىلدىڭ كونتەكسىندە، Air Astana-نىڭ ىشكى رەيستەرگە ورتاشا ءتاريفى 81 دوللار بولدى»،- دەپ ءتۇسىندىردى پيتەر فوستەر.
ونىڭ ايتۋىنشا، قازاقستاننىڭ ىشكى نارىعى 2020 جىلى ايتارلىقتاي قۇلدىراۋ بولعانىنا قاراماستان، وتە جوعارى قارقىنمەن دامىپ كەلەدى. IATA ستاتيستيكاسىنا سايكەس، ءبىزدىڭ ەل ءقازىر الەمدە ەڭ جىلدام دامىپ جاتقان ىشكى تاسىمالداۋ نارىعىنا يە.