بيىل 3 مىڭ قازاقستاندىق اسكەري جيىننان وتەدى.
قارۋلى كۇشتەر باس شتابى باستىعىنىڭ ورىنباسارى گەنەرال-مايور ساكەن ءجۇسىپوۆتىڭ ايتۋىنشا، 3 جانە ودان دا كوپ بالاسى بار جيىنعا شاقىرۋدان بوساتىلادى، دەپ حابارلايدى Almaty-akshamy.kz
سپيكەردىڭ ايتۋىنشا، اسكەري جيىننىڭ نەگىزگى ماقساتى – بەيبىت ۋاقىتتا قىسقارتىلعان ساندا ۇستالاتىن اسكەري بولىمدەردىڭ جاۋىنگەرلىك جانە جۇمىلدىرۋ دايىندىعىن ارتتىرۋ، سونىمەن قاتار جۇمىلدىرۋ جاعدايىندا قارۋلى كۇشتەر قۇرامىن كەڭەيتۋ ءۇشىن قاجەتتى زاپاستاعى اسكەري-وقىتىلعان رەسۋرستاردى دايارلاۋ جانە جيناقتاۋ.
گەنەرال-مايور ساكەن ءجۇسىپوۆ 30 كۇنگە سوزىلاتىن اسكەري جيىن جىل سايىن وتكىزىلەتىنىن ايتتى. وتكەن جىلى وعان 1500 ادام قاتىسسا، بۇل جولى ولاردىڭ سانى ەكى ەسە ارتتى.
«اسكەري جيىنعا شاقىرىلاتىندار سانىنىڭ ارتۋى اسكەري-ەسەپتىك ماماندىقتار بويىنشا دايارلاۋ جولىمەن اسكەري وقىتىلعان رەزەرۆتى جيناقتاۋ قاجەتتىلىگىنە بايلانىستى. اسكەري جيىنعا قاتىسۋ اسكەري مىندەتتىلەردىڭ ءبىلىمىن وزەكتەندىرۋگە جانە ولاردىڭ اسكەري ىستەگى داعدىلارىن قالپىنا كەلتىرۋگە مۇمكىندىك بەرەدى»، - دەدى ول.
ساكەن ءجۇسىپوۆتىڭ ۇسىنعان اقپاراتىنا سايكەس، جيىنعا قاتارداعى جاۋىنگەرلەر مەن سەرجانتتىق قۇرام وكىلدەرى 50 جاسقا دەيىن، ال وفيسەرلەر 60 جاسقا دەيىن شاقىرىلادى. ەگىس جانە ەگىن جيناۋ جۇمىستارى كەزەڭىندە اۋىل شارۋاشىلىعىندا جۇمىس ىستەيتىن ادامدار، وقۋ جىلى ىشىندە كۇندىزگى وقۋ نىسانىنداعى ءبىلىم بەرۋ ۇيىمدارىنىڭ پەداگوگتەرى، 18 جاسقا دەيىنگى ءۇش جانە ودان دا كوپ بالاسى بار ادامدار اسكەري جيىنعا شاقىرۋدان بوساتىلادى. ودان بولەك ازاماتتار شاقىرىلعانعا دەيىن مىندەتتى تۇردە مەديسينالىق كوميسسيادان ءوتۋى ءتيىس.
اسكەري جيىنعا شاقىرىلعان ازاماتتار اسكەردە قىزمەت ەتەتىن اسكەري قىزمەتشىلەرمەن تەڭ دارەجەدە زاتتاي مۇلىكپەن، تاماقپەن جانە مەديسينالىق قىزمەت كورسەتۋمەن قامتاماسىز ەتىلەدى.
اسكەري جيىن ۋاقىتىندا اسكەري مىندەتتىلەردىڭ جۇمىس ورنى مەن اتقاراتىن لاۋازىمى ساقتالادى، ياعني ولارعا ورتاشا جالاقى، ال جۇمىس ىستەمەيتىندەرگە مەملەكەت ەسەبىنەن ەڭ تومەنگى 85 مىڭ تەڭگە جالاقى تولەنەدى.
اسكەري مىندەتتىلەردى جيىنعا جەتكىزۋ جانە كەرى قاراي تاسىمالداۋ قورعانىس مينيسترلىگىنىڭ قاراجاتى ەسەبىنەن تەمىرجول جانە اۆتوموبيل كولىگىمەن جۇرگىزىلەدى. جيىن وقۋ پوليگوندارىندا وتكىزىلەدى. ونىڭ بارىسىندا اسكەري مىندەتتىلەردى دالالىق لاگەرگە ورنالاستىرادى.
باس شتاب باستىعىنىڭ ورىنباسارى اسكەري جيىنعا شاقىرىلعان اسكەري مىندەتتىلەر اسكەري قىزمەتشى مارتەبەسىنە يە بولاتىنىن جانە كازارمالىق جاعدايدا تۇراتىنىن دا اتاپ ءوتتى. ولاردى ءبولىمنىڭ ورنالاسقان جەرىنەن بوساتۋدى ىشكى قىزمەت جارعىسىندا بەلگىلەنگەن ەرەجەگە سايكەس جيىن باستىقتارى جۇرگىزەدى.