قۇرمانعازى اتىنداعى قازاق ۇلتتىق حالىق اسپاپتار وركەسترى 90-شى كونسەرتتىك ماۋسىمىنا اياق باستى.
الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا وسى وقيعاعا ارنالعان بريفينگ ءوتتى، دەپ حابارلايدى Almaty-akshamy.kz.
قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديرەكتورى مەدەت قۋانىشيەۆ كۇي مەن ۇلتتىق اسپاپتار ناعىز قازاقتىڭ ىشكى جان-دۇنيەسىن ناقتى بەرە الادى دەيدى.
قۇرمانعازى اتىنداعى قازاق ۇلتتىق حالىق اسپاپتار وركەسترى وتكەن عاسىردىڭ 30-جىلدارى نەگىزى قالانعان. باستاپقىدا دومبىرا ءانسامبلى بولىپ قۇرىلعان ونەر وشاعى بۇگىندە الەمگە ايگىلى وركەسترگە اينالىپ ۇلگەردى. قازاق مۋزىكاسىنىڭ تاريحىنداعى العاشقى وركەستردىڭ نەگىزىن قالعان قازاقستاننىڭ حالىق ءارتىسى، كومپوزيتور، اكادەميك، پروفەسسور، تۇڭعىش كوركەمدىك جەتەكشىسى جانە باس ديريجەرى احمەت جۇبانوۆ.
وركەستردىڭ قۇرىلعانىنا 10 جىل وتكەندە 1944 جىلى ۇرپاققا وشپەس مۋزىكالىق جاۋھارلار قالدىرعان قازاقتىڭ ۇلى كومپوزيتورى قۇرمانعازى ساعىرباي ۇلىنىڭ ەسىمى بەرىلگەن.
قۇرمانعازى وركەسترى – قازاق مۋزىكاسىنىڭ تاريحىنداعى اسپاپتىق مۋزىكا ونەرىنىڭ تۇڭعىش ءارى بىرەگەي ونەر وشاعى. بۇگىندە اتاقتى وركەستردە 80-گە جۋىق تالانتتى ارتيست قىزمەت اتقارۋدا، وركەستردىڭ رەپەرتۋارىندا 4000-نان استام شىعارما بار.
قۇرمانعازىنىڭ شىعارمالارى جانە ۇلتتىق وركەستر ارقىلى كۇللى الەم قازاقتىڭ مادەنيەتىن، ءسالت-داستۇرىن، مۋزىكالىق مادەنيەتىن، جان دۇنيەسىن تانۋدا. ال وركەستردىڭ رەپەرتۋارى قازىرگى زامان كومپوزيتورلارىنىڭ، سونىڭ ىشىندە شەتەل كومپوزيتورلارىنىڭ جاڭا تۋىندىلارىمەن تولىقتىرىلعان.
«بيىل قۇرمانعازى بابامىزدىڭ تۋعانىنا 200 جىل. 20 قاڭتاردا ۇلتتىق وركەستر ەلىمىزدە العاشقى بولىپ قۇرمانعازىنىڭ 200 جىلدىعىنا ارنالعان ءىس-شارالاردىڭ شىمىلدىعىن اشتى. بيىلعى جىل بارلىق شارالار قۇرمانعازى بابامىزدى ەسكە الۋعا ارنالادى»، – دەيدى وركەستر ديرەكتورى مەدەت قۋانىشيەۆ.
سونداي-اق، وركەستر باسشىسى 2022 جىلى قۇرمانعازى وركەسترىنىڭ گاسترولدىك ساپارمەن استراحان جانە قازانعا، كۇي اتاسىنىڭ كەسەنەسىنە بارىپ قايتقانىن ايتتى.
ۇستىمىزدەگى جىلدىڭ ماۋسىم ايىندا م.اۋەزوۆ اتىنداعى قازاق ۇلتتىق دراما تەاترىنىڭ ۇجىمىمەن «قۇرمانعازى» كونسەرت-سپەكتاكل بىرلەسكەن جوباسىن جۇزەگە اسىرۋدى جوسپارلاپ وتىر. سونىمەن قاتار، قازان ايىندا وركەستردىڭ ۇيىمداستىرۋىمەن رەسپۋبليكالىق ۇلتتىق اسپاپتار كونكۋرسى وتەدى.
«ماۋسىم ايىندا قۇرمانعازى وركەسترى يتالياعا گاسترولدىك ساپارعا اتتانادى، اتالمىش گاسترولدىك ساپارلارىمىز دا قۇرمانعازى بابامىزدىڭ رۋحىنا ارنالادى. ەل توڭىرەگىندە، ونىڭ ىشىندە جامبىل، قىزىلوردا وبلىستارىنا ءىس-ساپارعا شىعامىز. بيىل اتىراۋدا قۇرمانعازىنىڭ 200 جىلدىعىنا ارنالعان فەستيۆالدە العاشقىلاردىڭ ءبىرى بولىپ ونەر كورسەتەمىز. بۇدان بولەك، العا قويعان جوسپارلارىمىزدىڭ قاتارىندا – ايگىلى «اداي» جانە «سارىارقا» شىعارمالارى تۋرالى بەينەبايان ءتۇسىرۋ»، - دەپ ءسوزىن جالعاستىردى وركەستر ديرەكتورى.
قازاق ۇلتتىق حالىق اسپاپتار وركەسترىنىڭ باس ديريجەرى ابىلاي تىلەپبەرگەن ۇجىمنىڭ 90-شى كونسەرتتىك ماۋسىمعا اياق باسقانىن ايتتى. ۇلتتىق مۋزىكانى ءقادىر تۇتاتىن جاندار ءۇشىن وركەستردىڭ دايىنداعان ءىرى كولەمدەگى شىعارمالارى بارىن دا تىلگە تيەك ەتە وتىرىپ، ونەر ۇجىمى ارتىستەرىنىڭ سوڭعى جەتكەن جەتىستىكتەرىمەن دە ءبولىستى.
«الەمدىك بايقاۋدا قوبىزشىلارىمىز اسەل راحىمجان مەن زايراگۇل سۇيەكەنوۆا باس جۇلدەنى جەڭىپ الدى. قوبىز اۋەندەرى الەمدىك كلاسسيكالىق رەپەرتۋارعا ەنۋدە. قوبىز بۇگىندە بارلىق حالىقارالىق ساحنالاردا ءوز تىڭدارماندارىن تابۋدا، ءتىپتى، موسارت پەن بەتحوۆەن شىعارمالارىن دا قوبىزعا سالىپ وڭاي ورىنداۋعا بولادى»، – دەيدى ابىلاي تىلەپبەرگەن.
جۋرناليستەردىڭ سۇراقتارىنا جاۋاپ بەرگەن ديريجەر وركەستردىڭ الەۋمەتتىك جەلىلەردە بەلسەندى جۇمىس اتقارۋىنىڭ ارقاسىندا بۇگىندە جاستاردىڭ دا حالىق انىنە بەت بۇرعانىن اتاپ ءوتتى.
بريفينگتىڭ تاعى ءبىر قاتىسۋشىسى، قۇرمانعازى اتىنداعى قازاق ۇلتتىق حالىق اسپاپتار ءارتىسى، دومبىراشى ساعدات اقجولوۆا بۇگىندە وركەستر رەپەرتۋارىنىڭ كەڭەيىپ كەلە جاتقانىن ايتتى.
سونداي-اق، وركەستر باعدارلاماسىنداعى الەمدىك تانىمال كلاسسيكالىق تۋىندىلاردى 27 قاڭتار كۇنى ساعات 19.00-دە تىڭداۋعا بولادى.