سوعىس ارداگەرلەرى مەن بۇگىنگىنىڭ باتىرلارى تۋرالى جاڭا كىتاپ شىقتى
ىشكى ىستەر مينيسترلىگىنىڭ مۇراجايىندا «ۇلى دالا باتىرلارى» دەپ اتالاتىن جاڭا كىتاپتىڭ تۇساۋى كەسىلدى. ول ەكىنشى دۇنيەجۇزىلىك سوعىستا ەرلىك كورسەتكەن مايدانگەرلەر مەن بۇگىنگى بەيبىت زاماننىڭ باتىرلارىنا ارنالعان، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
انىقتامالىق-ەنسيكلوپەديالىق جيناق «ىشكى ىستەر ورگاندارى مەن ۇلتتىق ۇلاننىڭ قازاقستاندىق ارداگەرلەر ۇيىمى» قوعامدىق بىرلەستىگىنىڭ باستاماسىمەن، سونىمەن قاتار ىشكى ىستەر ءمينيسترى مارات احمەتجانوۆتىڭ قولداۋىمەن جارىققا شىقتى. شاراعا ايگىلى عارىشكەر، حالىق قاھارمانى توقتار اۋباكىروۆ پەن بۇرىنعى ىشكى ىستەر ءمينيسترى، حالىق قاھارمانى قايىربەك سۇلەيمەنوۆ قاتىستى.
«بۇل – كەلەسى ۇرپاققا زور ونەگە. وسىنداي ەرلىكتىڭ ارقاسىندا، وسىنداي ازاماتتاردىڭ ارقاسىندا ەگەمەندىكتى الىپ، بۇگىن ۇلكەن ءبىر جارقىن مەملەكەت بولىپ، دامىپ جاتىرمىز. مەن ءوز اتىمنان، سونداي-اق ارىپتەستەرىمنىڭ اتىنان سوعىس ارداگەرلەرىنە، حالىق قاھارماندارىنا تاعزىم ەتىپ، وسىنى باستاعان ۇلكەن ۇجىمعا العىسىمدى بىلدىرگىم كەلەدى»، - دەدى مينيستر مارات احمەتجانوۆ.
حالقىمىزعا بەيبىت كۇندەردى سىيلاعان باتىرلاردىڭ ومىرىنەن سىر شەرتەتىن كىتاپتىڭ تۇساۋىن كەسۋ مارتەبەسى قۇرمەتتى قوناقتارعا بەرىلدى.
«ءبىزدىڭ ۇلى دالا باتىرلارىن ۇمىتپاي، ەسكە الىپ، تاريحتى جيناپ، كىتاپ شىعارعاندارىڭىزعا راقمەت!» - دەدى توقتار اۋباكىروۆ.
«مۇنداي كىتاپتار ءبىرىنشى كەزەكتە ءبىز ءۇشىن ەمەس، جاستارىمىز ءۇشىن، جەكە قۇرام ءۇشىن جانە جالپى مەملەكەتىمىزدىڭ جاس بۋىنىنا ارنالادى»، - دەپ اتاپ ءوتتى حالىق قاھارمانى، گەنەرال-پولكوۆنيك قايىربەك سۇلەيمەنوۆ.
شارا بارىسىندا ءىىم ارداگەرلەر ۇيىمىنىڭ ءتوراعاسى ءومىرزاق بولسامبەكوۆ ۆەدومستۆو مۇراجايىنا تاريحي ەنسيكلوپەديانى سىيعا تارتتى.