قىرعىزستان "بۇزىلماس باۋىرلاستىق - 2023" وقۋ-جاتتىعۋلارىن وتكىزۋدى جوسپارلاپ وتىر
ۇجىمدىق قاۋىپسىزدىك شارتى ۇيىمىنىڭ باس حاتشىسى يمانعالي تاسماعامبەتوۆ قىرعىز ەلىنىڭ جوعارى ساياسي جانە اسكەري تۇلعالارىمەن كەزدەسۋ وتكىزۋ ءۇشىن بىشكەككە كەلىپ جەتتى، دەپ حابارلايدى Almaty-akshamy.kz.
قىرعىز رەسپۋبليكاسى پرەزيدەنتىنىڭ باسپا ءسوز قىزمەتى حابارلاعانداي، بۇل ساپار اياسىندا ۇقشۇ باس حاتشىسى يمانعالي تاسماعامبەتوۆ پەن ق ر پرەزيدەنتى سادىر جاپاروۆتىڭ كەزدەسۋى وتەدى، وندا تاراپتار وڭىرلىك قاۋىپسىزدىك پەن تۇراقتىلىقتى قامتاماسىز ەتۋ ماسەلەلەرىن، سونداي-اق اتالعان ۇيىم شەڭبەرىندەگى ءوزارا ءىس-قيمىلدىڭ باسىم باعىتتارىن تالقىلايدى دەپ كۇتىلەدى.
سادىر جاپاروۆ قىرعىزستان ۇقشۇ اياسىنداعى ىنتىماقتاستىققا وڭىردەگى قاۋىپسىزدىكتىڭ كەپىلى رەتىندە ايىرىقشا ءمان بەرەتىنىن اتاپ ءوتتى. اسكەري، اقپاراتتىق جانە گۋمانيتارلىق سيپاتتاعى شارالاردى ۇيلەستىرۋ ماقساتىندا قىرعىزستان بيىل ۇقشۇ بىتىمگەرشىلىك كۇشتەرىمەن "بۇزىلماس باۋىرلاستىق - 2023" وقۋ-جاتتىعۋلارىن وتكىزۋدى جوسپارلاپ وتىر.
ۇقشۇ باس حاتشىسى يمانعالي تاسماعامبەتوۆ ۇجىمدىق قاۋىپسىزدىك شارتى ۇيىمىنىڭ 2023 جىلعا ارنالعان باعدارلامالارى مەن باسىمدىقتارىن، سونداي-اق ۇقشۇ ۇقك كەزەكتى سەسسياسىنا دايىندىق بارىسىن باياندادى. ودان بولەك، ۇقشۇ ۇجىمدىق قاۋىپسىزدىك كەڭەسى شەشىمدەرىنىڭ ورىندالۋى جانە اعىمداعى جىلعا ارنالعان جۇمىس جوسپارى تۋرالى اقپارات بەرىلدى.
ايتا كەتسەك، ۇجىمدىق قاۋىپسىزدىك شارتى ۇيىمىنىڭ قۇرامىنا التى مەملەكەت كىرەدى: ارمەنيا، بەلارۋس، قازاقستان، قىرعىزستان، رەسەي جانە تاجىكستان.