جاپپاي ەگىس جۇمىستارىنا دايىندىق جالعاسۋدا.
قازاقستاندا اعىمداعى جىلدىڭ قاڭتار-ناۋرىز ايلارىندا ازىق-تۇلىك ونىمدەرىنىڭ ءوندىرىسى 3،8%-عا ءوسىپ، 607،8 ملرد تەڭگەنى قۇرادى. ەڭ جوعارى ءوسۋ قارقىنى كوكونىستەردى وڭدەۋدە، ۇن مەن بالىق وندىرۋدە بايقالدى. بۇل تۋرالى بۇگىن ۇكىمەت وتىرىسىندا اۋىل شارۋاشىلىعى ءمينيسترى ەربول قاراشوكەيەۆ مالىمدەدى، دەپ حابارلايدى Almaty-akshamy.kz Eldala.kz سىلتەمە جاساپ.
«قايتا وڭدەلگەن جانە كونسەرۆىلەنگەن كوكونىستەر ءوندىرىسىنىڭ 1،8 ەسەگە (4،7 مىڭ توننا)، ۇن ءوندىرىسى 23%-عا (881،4 مىڭ توننا)، جاس، توڭازىتىلعان نەمەسە مۇزداتىلعان بالىق ءوندىرىسى 21،5%-عا (10،1 مىڭ توننا)، جارما 8،3%-عا (26،6 مىڭ توننا)، شۇجىق ونىمدەرى 7،8%-عا (15 مىڭ توننا)، ماكارون ونىمدەرى 5،3%-عا (39،7 مىڭ توننا)، اشىعان ءسۇت ونىمدەرى 2،6%-عا (57،7 مىڭ توننا)»، - دەپ حابارلادى اشم باسشىسى.
جالپى، جىل باسىنان بەرى اۋىل شارۋاشىلىعىنىڭ جالپى ءونىمىنىڭ كولەمى 1،8%-عا ارتىپ، 700،3 ملرد تەڭگەنى قۇرادى. نەگىزىنەن بۇل ءوسىم مال شارۋاشىلىعى ەسەبىنەن قامتاماسىز ەتىلدى - 2%. سونىڭ ىشىندە ءتىرى سالماقتا ەت ءوندىرۋ 1،2%-عا، ءسۇت 1،3%-عا، تاۋىق جۇمىرتقاسى 11،6%-عا ارتتى.
وسىمدىك شارۋاشىلىعى ءونىمى وتكەن جىلدىڭ سايكەس كەزەڭىنە ۇقساس 42،8 ملرد تەڭگە سوماسىنا ءوندىرىلدى.
ازىق-تۇلىك ونىمدەرى ءوندىرىسىنىڭ نەگىزگى كاپيتالىنا ينۆەستيسيالار كولەمى ءۇش ايدا 35،8% - عا ارتىپ، 34،1 ملرد تەڭگەنى قۇرادى.
سونىمەن قاتار، جاپپاي ەگىس جۇمىستارىنا دايىندىق جالعاسۋدا. ەنەرگەتيكا ءمينيسترى بولات اقشولاقوۆتىڭ ايتۋىنشا، كوكتەمگى ەگىس جۇمىستارىن ۋاقىتىلى جانە تۇراقتى جۇرگىزۋ ءۇشىن اگرارشىلارعا 212 مىڭ تەڭگە/توننا (176 تەڭگە/ليتر) باعامەن 400 مىڭ توننا ديزەل وتىنى بولىنگەن. بۇل بولشەك ساۋدا باعاسىنان ايماققا بايلانىستى ورتا ەسەپپەن 15-30%-عا تومەن.