ۇمىتىلىپ بارا جاتقان ءداستۇر - «قىمىزمۇرىندىق» قايتا جاڭعىردى

اقمولا وبلىسىنىڭ تۇرعىندارى بيە بايلاپ، العاشقى قىمىز ءىشۋ ءراسىمىن اتاپ ءوتتى. 

  «قىمىزمۇرىندىق» داستۇرىنە ساي، جينالعاندار قىمىز ىشۋدەن جارىستى. 5 مينۋتتىڭ ىشىندە 10 توستاعاندى ءسىمىرىپ، «جىل كولتاۋىسارى» اتاعى ءۇشىن تالاستى، دەپ حابارلايدى Almaty-akshamy.kz Qazaqtv.com سىلتەمە جاساپ. 

قازاق حالقىنىڭ بولمىسى كورىنىس تاپقان شارادا ۇلتتىق ويىنداردان دا جارىس ءوتتى. شاباندوزدار بايگەگە ءتۇسىپ، پالۋاندار بەلدەسىپ، كوكپار تارتتى.

"بۇرىن مۇنداي بولماعان شىنىن ايتقاندا. ءقازىر بۇكىل اۋداننىڭ حالقى اتسالىسىپ، كوپتەگەن قوستار تىگىلدى. بيەلەردى بايلاپ كەلىندەر ساۋىپ كورسەتىپ جاتىر ءتىپتى، ۇمىتىلىپ كەتكەن داستۇرلەردى"، - دەيدى قورعالجىن اۋىلىنىڭ تۇرعىنى امانگەلدى اۋجانوۆ.

"كوكپارعا 80-90 ات قاتىستى. اقمولا وبلىسىنىڭ تۇكپىر-تۇكپىرىنەن پالۋاندار وسى كوكپارعا قاتىستى. الامان بايگەگە (25 شاقىرىم) 30-40 ات قاتىستى"، - دەيدى شالقار اۋىلىنىڭ تۇرعىنى مۇراگەر احمەتبەكوۆ.

قازاقتىڭ «قىمىزمۇرىندىق» ءداستۇرى «بيە بايلاۋ» مەن «ايعىر قوسۋ» جورالعىلارىمەن بىرگە 2018 جىلى يۋنەسكو-نىڭ ماتەريالدىق ەمەس مۇرالارىنىڭ تىزىمىنە ەنگەن.