وسى ورايدا، باعدارلامانىڭ وڭ تۇستارى مەن ولقىلىقتارىنا باينالىستى ساراپشىلاردىڭ پىكىرىن ءبىلىپ، ءوتىنىم بەرىپ ۇلگەرمەگەن انالاردىڭ شاعىمىنا قۇلاق استىق.
"مەن بۇگىن "وتباسى بانككە" بارعان ەدىم. ساعات 12:30 دا باعدارلاما جابىق دەپ قايتارىپ جىبەردى. باعدارلاما تاڭعى 09.00-دە اشىلىپ، ءۇش ساعاتتا قالاي تولىپ كەتەدى؟ سوندا كىمدەر الىپ ۇلگەردى؟ وسىنى تۇسىنبەي دال بولدىم. بانكتە كەزەك كۇتكەن ازاماتتاردىڭ قاراسى وتە كوپ. ءبارىمىز قۇجاتتارىمىزدى تاپسىرا الماي ساندالىپ قالدىق"، – دەيدى قالا تۇرعىنى گاۋحار ءىلياسوۆا.
قارجى ساراپشىسى ايبار ولجايەۆتىڭ پىكىرىنشە، يپوتەكانىڭ ءتيىمدى تۇستارى جەتەرلىك.
"مەنىڭ ويىمشا «ۇماي» يپوتەكاسى ءتيىمدى. سەبەبى ونىڭ ستاۆكاسى 14%. ال بىزدە بازالىق ستاۆكا - 16،75%. بانكتىكى ورتا ەسەپپەن 21-22% بولادى. سوندىقتان بازالىق ستاۆكادان تومەنگى كەز كەلگەن يپوتەكا ءتيىمدى. ودان بولەك يپوتەكانىڭ سوماسى وتە جاقسى 15،6 ملرد تەڭگە. قىسقارعان، شەكتەلگەن ليميت جوق. العاشقى جارناسى دا وتە قولجەتىمدى. ازاماتتارعا وتە ىڭعايلى يپوتەكا. بۇل يپوتەكاعا سۇرانىس جوعارى ەكەنىن ەستىپ جاتىرمىن"، – دەيدى ايبار ولجايەۆ.
تۇرعىندار سوڭعى ۋاقىتتا ۇكىمەتتىك باعدارلامالارعا تاپسىرۋ جارىس سەكىلدى بولىپ كەتكەنىن ايتىپ شاعىمداندى.
ءبىزدىڭ ەلىمىزدە 19 ملن ادام ەمەس، 180 ملن ادام تۇراتىن سەكىلدى. حالىقتىڭ باسىم كوپشىلىگىندە ءۇي جوق. اۋىلدى مەكەندەردە جۇمىس جوق. ءبارى قالاعا قاراي كوشەدى. الماتى قالاسىندا تۇرىپ جاتقانىمىزعا 20 جىلدان استام ۋاقىت ءوتتى. ءالى كۇنگە ءۇي الا الماي ءجۇرمىز. ءوزىم جالعىزباستى انامىن. ەكى بىردەي ۇل تاربيەلەپ وتىرىمىن. ءالى كۇنگە جالدامالى پاتەردە تۇرىپ جاتىرمىز. سوڭعى ۋاقىتتا بارلىعى جارىس سەكىلدى بولىپ كەتتى. 4%-پەن كولىك الۋ 18 سەكۋندتا جابىلعان ەدى. ەندى «ۇماي» يپوتەكاسىنا ءوتىنىش بەرىپ ۇلگەرمەدىك. بالالارىمىزدى تەگىن قوسىمشاعا جازۋ كەزىندە دە سايتتان قاتەلىك شىعىپ، كەلەسى كۇنى بالالاردىڭ تولىپ كەتەكەنى جايلى حابار شىقتى. ءتيىمدى باعدارلاماعا قاتىسۋ ءۇشىن ءبارىمىز جانتالاسۋىمىز قاجەت سەكىلدى، – دەيدى باقىت تۇرعىنباي ەسىمدى قالا تۇرعىنى.
اتالعان جاعدايدىڭ ءمان-جايىن سۇراپ «وتباسى بانكتىڭ» بولىمشەسىنە حابارلاستىق.
"وتىنىشتەر ونلاين جانە وفلاين قابىلداندى. ازاماتتار كەزەكپەن تۇرىپ، قۇجاتتارىن تاپسىردى. 15،6 ملرد قارجى يگەرىلگەندىكتەن، باعدارلاما جابىلدى. الداعى ۋاقىتتا قانشا ادامنىڭ قۇجاتى قابىلدانعانى جايلى اقپارات شىعادى، – دەپ حابارلادى «وتباسى بانكتە».