كوپتەگەن ەلدەردە كەڭ تارالعان جانە بالالار اراسىندا تانىمال سلاش سۋسىنىنىڭ قۇرامىندا زياندى زاتتار بولۋى مۇمكىن. بۇل سۋسىن جەمىس شىرىنى مەن گازدى سۋدان جاسالىپ، ونىڭ ۇستىنە مۇز قوسىلادى. مۇزدىڭ تەز ەرىمەۋىن جانە دەسەرتتىڭ ءدامىن ساقتاۋ ءۇشىن سلاشقا گليسەرين قوسىلادى. الايدا، بۇل بالالار ءۇشىن وتە زياندى بولۋى مۇمكىن، دەپ حابارلايدى aqshamnews.kz
ۇلىبريتانيانىڭ تاعام ستاندارتتارى جونىندەگى اگەنتتىگى 5 جاسقا دەيىنگى بالالارعا سلاش سۋسىندارىن بەرمەۋدى ۇسىنادى. ال 11 جاسقا دەيىنگى بالالارعا كۇنىنە تەك 1 ستاقاننان ارتىق ىشپەۋگە كەڭەس بەرەدى. ەگەر بۇل نورمالار بۇزىلسا، بالا اعزاسىندا گليسەرين كوبەيىپ، گيپوگليكەمياعا (قاندا گليۋكوزانىڭ كۇرت تومەندەۋى) اكەلىپ، ءتىپتى ەستەن تانۋعا سەبەپ بولۋى مۇمكىن. ۇلىبريتانيادا وسى جاعدايمەن 20-دان استام بالا اۋرۋحاناعا تۇسكەن.
زەرتتەۋ ناتيجەلەرى Archives of Disease in Childhood جۋرنالىندا جاريالانعان. بالالار اۋرۋحانادان ساۋىعىپ شىققاننان كەيىن سلاشقا جولامايتىن بولدى.
قازاقستاندا دا مەكتەپ جانىنداعى دۇكەندەردە ءتۇرلى ءتۇستى جانە ارزان تاتتىلەر كوپ ساتىلادى. كوبىنەسە سانيتارلىق تالاپتار ساقتالمايدى، بۇل بالالاردىڭ دەنساۋلىعىنا ءقاۋىپ توندىرەدى. اتا-انالار بالالاردىڭ نە جەپ جۇرگەنىن باقىلاپ، ولاردىڭ دەنساۋلىعىنا كوڭىل ءبولۋى ماڭىزدى.