ۇلى جەڭىسكە – ماڭگىلىك تاعزىم

الماتىدا ۇلى جەڭىستىڭ 80 جىلدىعىنا ارنالعان تاريحي-رۋحاني كەزدەسۋ ءوتتى

الماتى قالاسىنداعى ورتالىقتاندىرىلعان كىتاپحانا جۇيەسىنىڭ №4 كىتاپحانا-بولىمشەسىندە ۇلى جەڭىستىڭ 80 جىلدىعىنا وراي «ۇلى جەڭىسكە – ماڭگىلىك تاعزىم» اتتى تاريحي-رۋحاني كەزدەسۋ ۇيىمداستىرىلدى. بۇل تۋرالى Aqshamnews.kz سايتى حابارلايدى.

جيىننىڭ نەگىزگى ماقساتى – سوعىس ارداگەرلەرىنىڭ ەستەلىكتەرى ارقىلى جاستارعا بەيبىت ءومىردىڭ ءقادىرىن ۇعىندىرۋ، وتانسۇيگىشتىك پەن ازاماتتىق جاۋاپكەرشىلىككە تاربيەلەۋ.

كەزدەسۋگە قاتىسقان سوعىس جانە اسكەري قىزمەت ارداگەرلەرى ءوز ومىرلەرىنەن سىر شەرتىپ، جاس ۇرپاققا ادامگەرشىلىك پەن ەلگە قىزمەت ەتۋدىڭ ماڭىزىن جەتكىزدى. دامانسك وقيعاسىنىڭ ارداگەرى وڭعاربەك سىدىقبەكوۆ جاستاردى قيىن ساتتە دە ادامي قاسيەتتى جوعالتپاۋعا ۇندەدى:

«جاستاردى وتان سۇيگىشتىككە، بىلىمگە تاربيەلەپ، قانداي جاعداي بولسا دا ادامگەرشىلىكتى جوعالتپاۋدى ۇيرەتۋ كەرەك»، – دەدى ول.

اۋعان سوعىسىنىڭ ارداگەرى دۋان ۋماروۆ تا ءوز قىزمەت جولىنان ەستەلىك ايتىپ، ەل ءۇشىن قىزمەت ەتۋدىڭ ءقادىرى تۋرالى ءسوز قوزعادى:

«بىزدە اتالارىمىزدىڭ ارتىنان ءجۇرىپ، باسقا ەلگە قىزمەت ەتتىك. 1973 جىلى كۋبا ارالىعىندا بولدىم»، – دەدى ول.

ءىس-شارا بارىسىندا كىتاپحانا قىزمەتكەرلەرى مەن ۇيىمداستىرۋشىلار جاستارمەن اشىق ديالوگ قۇرىپ، ولاردىڭ ەل تاريحىنا دەگەن قىزىعۋشىلىعىن وياتۋعا تىرىستى. كەزدەسۋ جاس ۇرپاقتىڭ بويىنا پاتريوتتىق رۋح پەن ۇلتتىق سانا قالىپتاستىرۋعا باعىتتالعان مازمۇندى ءارى ماعىنالى شارا رەتىندە ءوتتى.

«ۇلى جەڭىسكە – ماڭگىلىك تاعزىم» اتتى تاريحي-رۋحاني كەزدەسۋ – باتىرلار ەرلىگى مەن بەيبىت ءومىردىڭ ءقادىرىن دارىپتەۋگە ارنالعان تاعىلىمدى شارا بولدى. مۇنداي كەزدەسۋلەر وسكەلەڭ ۇرپاقتىڭ ەلگە دەگەن سۇيىسپەنشىلىگىن ارتتىرىپ، وتكەنگە تاعزىم ەتىپ، بولاشاققا جاۋاپكەرشىلىكپەن قاراۋعا تاربيەلەيدى.