ۇلى دالا التىندارى ۇلىبريتانيادا تانىستىرىلدى

 ۇلىبريتانياداعى كەمبريدج ۋنيۆەرسيتەتىنىڭ فيسۋيليام مۇراجايىندا قازاقستان تاۋەلسىزدىگىنىڭ 30 جىلدىعى قۇرمەتىنە ۇيىمداستىرىلعان كورمە اشىلدى.

«ۇلى دالا التىنى» كورمەسىنە ءبىزدىڭ داۋىرىمىزگە دەيىنگى VIII-III عاسىرلاردا ورتالىق ازيادا، اتاپ ايتقاندا، قازاقستاننىڭ التاي تاۋ جۇيەسىندە ۇستەمدىك ەتكەن سكيف وركەنيەتىنىڭ جادىگەرلەرى، ساق قورعاندارىنان تابىلعان قۇندى دۇنيەلەر قويىلدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.

سونىمەن قاتار كورمە قوناقتارىنا بەرەل، شىلىكتى جانە ەلەكە سازى سياقتى ءۇش ءتۇرلى قورىمنان شىققان جۇزگە جۋىق ارحەولوگيالىق ولجالار ۇسىنىلعان. ال ولاردىڭ ىشىندەگى ەڭ باعالى ەكسپوناتتاردىڭ ءبىرى - كيىمدەرى 15 000 التىن زاتتان تۇراتىن التىن ادام دا بار.

بۇگىندە وتاندىق ارحەولوگتار قورعانداردان تابىلعان جادىگەرلەردى بريتانيالىق ارىپتەستەرىمەن بىرگە زەرتتەپ كەلەدى. كەمبريدج ۋنيۆەرسيتەتى جانىنداعى ماكدونالد ارحەولوگيالىق زەرتتەۋ ينستيتۋتىنىڭ عالىمدارى جاڭا تەحنولوگيالاردى قولدانا وتىرىپ، بىرەگەي ارتەفاكتىلەردىڭ قۇپيالارىن اشىپ جاتىر.

«ءبىز ميكرواناليزدەر جاسايمىز. زاماناۋي ميكروسكوپتىڭ كومەگىمەن ەجەلگى ساقتاردىڭ قانداي تەحنولوگيالار پايدالانعانىن جانە قولونەر بۇيىمدارىن قالاي جاساعانىن زەرتتەي الامىز»، - دەدى كورمە كۋراتورى رەبەككا روبەرتس.

ايتا كەتەيىك، وسىنداي بىرەگەي التىن ارتەفاكتىلەر ەۋروپالىق اۋديتورياعا العاش رەت ۇسىنىلىپ وتىر. ولاردى بريتانيالىق ب ا ق «حالىقارالىق ارحەولوگيالىق سەنساسيا» دەپ اتادى. ەكسپوزيسيانى كەلەر جىلدىڭ 30 قاڭتارىنا دەيىن تاماشالاۋعا بولادى.