بريتانيالىق انشىلەر ۇلى ابايدىڭ اندەرىن ءوز رەپەرتۋارىنا قوسىپ، كونسەرتتەرىندە ايتىپ ءجۇر.
ونەر ادامدارىنىڭ پىكىرىنشە، اقىننىڭ مۋزىكالىق مۇراسى مەلوديالىق جانە ىرعاقتىق تۇرعىدا وتە ءساتتى شىققان، دەپ حابارلايدى Almaty-akshamy.kz قازاقپاراتقا سىلتەمە جاساپ.
جاڭا بريتانيالىق پوپ-سەنساسيا، ءانشى ءارى اۆتور سمايلي (Smilee) «كوزىمنىڭ قاراسى» ءانىن ناقىشىنا كەلتىرە ايتىپ، تىڭدارمانىنىڭ زور ىقىلاسىنا بولەنىپ ءجۇر. نازىك داۋىستى ورىنداۋشى گيتارانىڭ سۇيەمەلدەۋىمەن اعىلشىن تىلىنە اۋدارىلعان ءاندى كەرەمەت شىرقايدى.
سمايلي - لوندونداعى ورىنداۋشىلىق ونەر جانە تەحنولوگيالار مەكتەبىنىڭ تۇلەگى. ول الەمگە ايگىلى ادەل، ەمي ۋاينحاۋس جانە كەيت نەش سياقتى انشىلەرمەن قاتار وسى وقۋ ورنىندا كاسىبي ءبىلىم العان. ءدال وسى جەردە، نەبارى 14 جاسىندا ول ءوزىنىڭ العاشقى ءانىن ەڭ جاقىن دوسىمەن بىرگە جازدى. سودان بەرى ونىڭ مۋزىكا جازۋعا جانە ورىنداۋعا دەگەن قۇشتارلىعى ارتپاسا، كەمىگەن جوق.
سمايلي ۇلىبريتانيادا جانە شەتەلدە گاسترولدىك ساپارلارعا شىعىپ، جاندى داۋىستا ءان ايتىپ جۇرگەندە بەلگىلى مۋزىكالىق پروديۋسەر دەنيس ينگولدسبيدىڭ نازارىنا ىلىگەدى. ءسويتىپ ونىڭ جۇلدىزى ءتىپتى جارقىراي تۇسەدى.
ءقازىر دە جاس ءانشى كونسەرتكە شىققان كەزىندە ابايدىڭ «The Apple of My Eye» ءانىن اعىلشىن تىلىندە ورىنداپ، كورەرمەندەردىڭ كوزايىمىنا اينالدى.
بۇدان بولەك وپەرا ءانشىسى دجوزەفين حوتورن «Blessings on You» («ايتىم سالەم، قالامقاس») ءانىن ورىنداپ ءجۇر. نيۋكاسل قالاسىنان شىققان جاس ءانشى، اقىن جانە كومپوزيتور اننابەل پاتتينسون بولسا، «جەلسىز تۇندە جارىق اي» ءانىن اعىلشىنشا ناقىشىنا كەلتىرە ورىندايدى.
اندەردىڭ ادەبي اۋدارماسىن ايگىلى شوتلاند اقىنى، پروفەسسور دجون بەرنسايد جاساعان. ونى قازاقستاندىق تاراپ سوزبە-سوز تارجىمامەن قامتاماسىز ەتىپ وتىرعان. اقىن ءتۇپنۇسقاعا بارىنشا جاقىن بولۋعا تىرىسىپتى.
«ارينە، اۋدارما دەگەن وڭاي جۇمىس ەمەس. وتە قيىن بولدى. ءبىراق تالاپ ۇدەسىنەن شىعۋعا تىرىستىق. ويتكەنى بۇل جوباعا ءوز باسىم قاتتى قىزىقتىم. اباي ولەڭدەرىنىڭ ريتميكاسىن جوعالتپاي، دالمە-دال اۋدارۋ باستى تالاپ بولدى. سونىمەن قاتار ۇيقاس جاعىن دا ۇمىتپاۋ كەرەك بولدى. مۇنداي ولەڭدەر اۋدارىلعاندا، ادەتتە، بۇل ستراتەگيا قولدانىلمايدى»، دەيدى دجون بەرنسايد.