شەتەل ۆاليۋتاسىنداعى دەپوزيتتەردىڭ كولەمى 13،9 پايىزعا ءوستى
قازاقستاندا دەپوزيتتەردىڭ سوماسى ءبىر ايدا 7،6 پايىزعا ۇلعايدى. بۇل تۋرالى ق ر ۇلتتىق بانكى ءمالىم ەتتى، دەپ حابارلايدى Almaty-akshamy.kz.
«رەزيدەنتتەردىڭ دەپوزيتتىك ۇيىمدارداعى دەپوزيتتەرىنىڭ كولەمى ءبىر ايدا 7،6 پايىزعا ارتىپ (جىلدىق ماندە ءوسۋ 8،1% بولدى)، 2022 جىلعى ماۋسىمنىڭ سوڭىندا 27 162،9 ملرد تەڭگە بولدى. زاڭدى تۇلعالاردىڭ دەپوزيتتەرى ءبىر ايدا 13 801،2 ملرد تەڭگەگە دەيىن 8،2 پايىزعا ۇلعايدى، جەكە تۇلعالاردىڭ دەپوزيتتەرى 13 361،7 ملرد تەڭگەگە دەيىن 7 پايىزعا ءوستى»، - دەلىنگەن ۇلتتىق بانك مالىمەتىندە.
ۇلتتىق ۆاليۋتاداعى دەپوزيتتەردىڭ كولەمى ءبىر ايدا 17 581،2 ملرد تەڭگەگە دەيىن 4،5 پايىزعا ارتتى. شەتەل ۆاليۋتاسىنداعى دەپوزيتتەردىڭ كولەمى 9 581،7 ملرد تەڭگەگە دەيىن 13،9 پايىزعا ءوستى. دوللارلاندىرۋ دەڭگەيى 2022 جىلعى ماۋسىمنىڭ سوڭىندا 35،3% (2021 جىلعى جەلتوقساندا – 36%) بولدى.
«زاڭدى تۇلعالاردىڭ ۇلتتىق ۆاليۋتاداعى دەپوزيتتەرى 2022 جىلعى ماۋسىمدا 8 715،6 ملرد تەڭگەگە دەيىن 3،2 پايىزعا ءوستى، شەتەل ۆاليۋتاسىنداعى دەپوزيتتەر 5 085،6 ملرد تەڭگەگە دەيىن 18،1 پايىزعا ارتتى. جەكە تۇلعالاردىڭ تەڭگەدەگى دەپوزيتتەرى 8 865،6 ملرد تەڭگەگە دەيىن 5،8 پايىزعا ۇلعايدى، ال شەتەل ۆاليۋتاسىنداعى دەپوزيتتەرى 4 496،1 ملرد تەڭگەگە دەيىن 9،5 پايىزعا ارتتى»، - دەپ اتالىپ وتكەن ۇب اقپاراتىندا.
بۇدان بۇرىن حابارلانعانداي، بيىل ماۋسىم ايىندا قازاقستاندا اقش دوللارىن ساتىپ الۋ قارقىنى باسەڭدەدى.