الماتى وبلىسىندا ۇلتتىق ۇلان باسشىلىق قۇرامىنىڭ جەدەل دايىندىعى ءوتتى.
الماتى وبلىسى جەتىگەن كەنتىندەگى ۇلتتىق ۇلاننىڭ جاۋىنگەرلىك جانە ادىستەمەلىك دايارلىق ورتالىعىندا وڭىرلىك قولباسشىلىقتاردىڭ قولباسشىلارىمەن، قۇرامالار مەن اسكەري بولىمدەردىڭ كومانديرلەرىمەن، ولاردىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارلارىمەن وقۋ-ادىستەمەلىك جيىن ءوتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ءۇش كۇن بويى كومانديرلىك بۋىن وفيسەرلەرىنىڭ كاسىبي دايارلىعى تەكسەرىلدى. جيىن بارىسىندا باسشىلىق قۇرامنىڭ اتىس، دەنە شىنىقتىرۋ، ادىستەمەلىك جانە مەملەكەتتىك-قۇقىقتىق دايارلىق بويىنشا پراكتيكالىق داعدىلاردى، باسشىلىق قۇجاتتاردى ءبىلۋى پىسىقتالدى. سونداي-اق اسكەرلەردى باسقارۋدى جەتىلدىرۋ بويىنشا پراكتيكالىق داعدىلاردى قوسا العاندا، كاسىبي-لاۋازىمدىق دايارلىقتىڭ نەگىزگى پاندەرى بويىنشا سىناقتار قابىلداندى. ۇلتتىق ۇلان باس قولباسشىسىنىڭ ورىنباسارى باۋىرجان ءابجانوۆ جيىنعا جەتەكشىلىك ەتىپ، جەدەل دايىندىق بارىسىندا وفيسەرلەرمەن پراكتيكالىق ساباقتار وتكىزۋگە باسا نازار اۋدارىلعانىن اتاپ ءوتتى.
كومانديرلەر مەن ولاردىڭ ورىنباسارلارى ءارتۇرلى قارۋلاردان: تاپانشالاردان، اۆتوماتتاردان، تەگىس ۇڭعىلى مىلتىقتاردان، گراناتومەتتەردەن جانە پۋلەمەتتەردەن كۇندىز-تۇنى قوزعالمايتىن، وقىس پايدا بولاتىن جانە قوزعالاتىن نىسانداردان اتۋ داعدىلارىن كورسەتتى. سونداي-اق، وفيسەرلەر سۋ كەدەرگىلەرىن ەڭسەرە وتىرىپ، قيىن جاعدايلاردا جاۋىنگەرلىك ماشينالاردى جۇرگىزۋ كۋرسىنان ءوتتى.
جيىن بارىسىندا وفيسەرلەرمەن قۇقىقتىق ءتارتىپ اسكەرلەرىنىڭ جاۋىنگەرلىك قىزمەتىن قامتاماسىز ەتۋدىڭ نەگىزگى تۇرلەرى: جاۋىنگەرلىك دايارلىق، اسكەرلەر قىزمەتى جانە اسكەري قىزمەتتىڭ قاۋىپسىزدىگى، مورالدىق-پسيحولوگيالىق قامتاماسىز ەتۋ، قاراماعىناعىلارمەن جەكە تاربيە جۇمىسىن جۇرگىزۋ، اسكەري ۇجىمدا ءتارتىپتى بۇزۋدىڭ الدىن الۋعا باعىتتالعان ءىس-شارالاردى جوسپارلاۋ بويىنشا دارىستەر، وقۋ-ادىستەمەلىك، نۇسقاۋلىق جانە كورسەتۋ ساباقتارى وتكىزىلدى. توتەنشە جاعداي ەنگىزىلگەن كەزدە ۇلتتىق ۇلاننىڭ اسكەري جاساقتارى مەن بولىمشەلەرىنىڭ قولدانىلۋى كورسەتىلدى.
جاۋىنگەرلىك دايارلىق باس باسقارماسىنىڭ باستىعى نۇرلان مۇحامەدوۆ اتاپ وتكەندەي، بۇل جيىن وفيسەرلەردىڭ كۇندەلىكتى قىزمەتتى ۇيىمداستىرۋ، جەكە قۇرامدى باسقارۋ، تەحنيكا مەن قارۋ-جاراقتى پايدالانۋ ماسەلەلەرىندەگى ءبىلىمى مەن داعدىلارىن ايتارلىقتاي ارتتىرۋعا مۇمكىندىك بەردى.
سونداي-اق، جەدەل دايىندىق شەڭبەرىندە اسكەري بولىمدەردىڭ كومانديرلەرىمەن العاش رەت ەلدى مەكەندەگى جاپپاي تارتىپسىزدىكتەردىڭ جولىن كەسۋ جانە جويۋ، باتالوندىق تاكتيكالىق توپتىڭ زاڭسىز قارۋلى قۇرامالارىنىڭ قىزمەتىن ىزدەۋ جانە جولىن كەسۋ بويىنشا ارنايى وپەراسيا جۇرگىزۋدەگى جۇمىسى بويىنشا شتابتىق جاتتىعۋ وتكىزىلدى. وقۋ-ادىستەمەلىك جيىنداردىڭ سوڭعى كۇنى ق ر ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى ەركىن بوتاقانوۆتىڭ ءتوراعالىق ەتۋىمەن ۇلتتىق ۇلان اسكەري كەڭەسىنىڭ كوشپەلى وتىرىسى وتكىزىلدى، وندا 2022 جىلدىڭ ءبىرىنشى جارتىجىلدىعىنداعى اسكەرلەردىڭ قىزمەتتىك-جاۋىنگەرلىك قىزمەتىنىڭ قورىتىندىلارى شىعارىلىپ، قازاقستان رەسپۋبليكاسى پرەزيدەنتىنىڭ تالاپتارىنا سايكەس اسكەرلەردى ودان ءارى جەتىلدىرۋ جانە دامىتۋ ماسەلەلەرى قارالدى.
سونداي-اق، قازاقستان رەسپۋبليكاسى ءىىم القاسىنىڭ كادرلىق جۇمىستى جەتىلدىرۋ، قۇقىق قورعاۋ ورگاندارىمەن ءوزارا ءىس-قيمىل جاساۋ جانە قۇقىقتىق ءتارتىپ زاڭدىلىعىن نىعايتۋ ماسەلەلەرى بويىنشا شەشىمدەرى جەتكىزىلدى.