ۇلتتىق ۇلاننىڭ اسكەري قىزمەتشىلەرى دە ەل تاعدىرىن شەشەتىن بۇل ناۋقاننان تىس قالمادى. اسكەردىڭ جەكە قۇرامى ءوز تاڭداۋلارىن جاساپ، داۋىس بەرۋدى اياقتادى.
تاڭعى ساعات 06.00-دە الماتىداعى 5571 اسكەري بولىمىندەگى №107 داۋىس بەرۋ ۋچاسكەسىنە العاشقىلاردىڭ ءبىرى بولىپ قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ قولباسشىسى، گەنەرال-مايور تالاپكەر امىرەيەۆ كەلىپ، ءوز داۋىسىن بەردى.
«وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك نيازتاي الكەشيەۆتىڭ ايتۋىنشا، اسكەري بولىمدەردە اشىلعان سايلاۋ ۋچاسكەلەرىندە داۋىس بەرۋشىلەردىڭ بەلسەندىلىگى وتە جوعارى بولدى. اسكەري قىزمەتشىلەردىڭ جەكە قۇرامى عانا ەمەس، ولاردىڭ وتباسى مۇشەلەرى دە ساياسي ناۋقانعا تۇگەل قاتىسقان.
ۇلتتىق ۇلاننىڭ «وڭتۇستىك» وڭىرلىككە قاراستى اسكەري بولىمدەردەگى وتان الدىنداعى ازاماتتىق بورىشىن وتەپ جۇرگەن جاۋىنگەرلەر اسكەري قالاشىقتار اۋماعىندا ورنالاسقان 9 سايلاۋ ۋچاسكەسىندە داۋىس بەردى.
ولاردىڭ اراسىندا داۋىس بەرۋگە العاش رەت قاتىسقاندار كوپ. 18-گە ەندى تولعان، تۇڭعىش رەت داۋىس بەرۋ قۇقىعىنا يە بولعان جاس ساربازدارعا ارنايى سىيلىقتار تابىستالدى. تۇڭعىش رەت داۋىس بەرۋشىلەردىڭ ءبىرى – 5571 اسكەري بولىمىندەگى قاتارداعى سانجار تولەگەنوۆ:
— مەن تاۋەلسىز قازاقستاننىڭ ازاماتى رەتىندە ەلىمىزدە وڭ وزگەرىستەردىڭ بولعانىن قالايمىن. سول ءۇشىن بۇگىن ازاماتتىق پارىزىمدى اتقارىپ، داۋىسىمدى بەردىم، — دەيدى.
— ءبىز داۋىس بەرۋدى قورىتىندىلادىق. اسكەري بولىمدەردەگى بارلىق سايلاۋ ۋچاسكەسىندە جەكە قۇرام ەلىمىزدىڭ بولاشاعى ءۇشىن ءوز داۋىستارىن بەردى. ەشقانداي قۇقىق جانە ەرەجە بۇزۋشىلىقتار انىقتالعان جوق، — دەدى پولكوۆنيك نيازتاي الكەشيەۆ.
ايتا كەتەيىك، «وڭتۇستىك» وڭىرلىك قولباسشىلىعىنا قاراستى اسكەري بولىمدەردە سايلاۋ قۇقىعى بار 9000-عا جۋىق ازامات قىزمەت ەتەدى.
