2024 جىلعى 1 قاڭتاردان باستاپ قازاقستاندا "ۇلتتىق قور – بالالارعا" باعدارلاماسى باستالادى.
باعدارلاماعا قاتىستى تولىققاندى اقپاراتتى، ونى ىسكە اسىرۋ بارىسى مەن شارتتارىنا بايلانىستى ءسىزدى مازالاعان سۇراقتاردىڭ جاۋابىن "ۇلتتىق قور – بالالارعا" ارنايى پاراقشاسىنان تابا الاسىز، دەپ حابارلايدى Almaty-akshamy.kz
بۇل باعدارلامانىڭ اياسىندا قازاقستاننىڭ ءار بالاسىنىڭ جيناقتاۋشى شوتىنا قارجى اۋدارىلادى، ول قاراجاتتى بولاشاقتا بىلىمگە نەمەسە باسپانا ساتىپ الۋعا جۇمساۋعا بولادى.
پرەزيدەنت قول قويعان زاڭعا سايكەس، ۇلتتىق قوردىڭ جىلدىق ينۆەستيسيالىق كىرىسىنىڭ 50%-ى قازاقستان بالالارىنىڭ ارنايى جيناق شوتتارىنا 18 جاسقا تولعانعا دەيىن اۋدارىلىپ تۇرادى. قارجى قازاقستان ازاماتى سانالاتىن جانە 18 جاسقا تولماعان بارلىق بالاعا تەڭدەي بولىنەدى.
قاراجات بجزق-داعى جەكە شوتتارعا تۇسەدى، شوت "جەكە تۇلعالار" مەملەكەتتىك دەرەكتەر بازاسىنداعى اقپارات نەگىزىندە ءار بالاعا اۆتوماتتى تۇردە اشىلادى، ياعني اتا-انالارعا بانككە نەمەسە بجزق-عا ارنايى بارۋدىڭ قاجەتى جوق.
بالانىڭ "ۇلتتىق قور – بالالارعا" باعدارلاماسىنا قاتىسا الاتىنىن نەمەسە قاتىسا المايتىنىن egov.kz پورتالىنداعى جەكە كابينەتتەن بىلۋگە بولادى. بۇدان بولەك، زەينەتاقى قورىنىڭ enpf.kz رەسمي سايتىندا تۇراقتى تۇردە مالىمەتتەر جاريالانىپ تۇرادى.
العاشقى تولەمدەر ماقساتتى شوتتارعا 2024 جىلدىڭ 1 توقسانىندا تۇسەدى.
اقشانى بىردەن شەشىپ الۋعا بولمايدى. اقشا بالالاردىڭ ماقساتتى جيناق شوتتارىندا بالا 18 جاسقا تولعانعا دەيىن جينالىپ تۇرادى. 18 جاسقا تولعان سوڭ اقشا شوتتا 10 جىل ساقتالادى. ەگەر جيناقتالعان قاراجات 28 جاسقا دەيىن پايدالانىلماسا، ول الۋشىنىڭ زەينەتاقى شوتىنا اۋدارىلادى.
ەگەر بالا 18 جاسقا تولعانعا دەيىن ەلدەن كەتىپ، ازاماتتىعىن اۋىستىراتىن بولسا، وندا ول تولەم تالاپ ەتۋ قۇقىعىنان ايىرىلادى. ەگەر بالا 18 جاسقا تولعانعا دەيىن ەلدەن كەتكەنىمەن، ازاماتتىعىن اۋىستىرمايتىن بولسا، وندا ونىڭ تولەم تالاپ ەتۋ قۇقىعى ساقتالادى.
ازاماتتىق زاڭناماعا سايكەس ناقتى جيناقتالعان قاراجاتتى مۇراگەرلىك جولمەن بەرۋ مۇمكىندىگى قاراستىرىلعان. بالا ارەكەتكە قابىلەتسىز بولعان جاعدايدا، اقشانى باسقارۋ قۇقىعى اتا-اناسىنا نەمەسە قورعانشىلارىنا وتەدى.
بالا كامەلەت جاسقا تولعاننان كەيىن جيناقتالعان قارجىنى ەكى ماقساتتا جۇمساي الادى: تۇرعىن ءۇي جاعدايىن جاقسارتۋعا نەمەسە وقۋ اقىسىن تولەۋگە. جوباعا سايكەس، تۇرعىن ءۇيدى تەك قازاقستان اۋماعىنان الا الادى، ال وقۋ اقىسىن قازاقستاندا دا، شەتەلدىك وقۋ مەكەمەسىندە دە تولەي الادى.
بجزق شوتىندا جينالعان سومانى ۋاكىلەتتى وپەراتور ارقىلى تاڭدالعان ماقساتقا اۋدارۋعا بولادى.
وتباسى بانك – وسى ماڭىزدى الەۋمەتتىك جوبانىڭ ۋاكىلەتتى وپەراتورلارىنىڭ ءبىرى. وتباسى بانكتىڭ enpf-otbasy.kz پلاتفورماسىن پايدالانا وتىرىپ، 2024 جىلدىڭ باسىنان باستاپ 18 جاستان اسقان ازاماتتار العان قاراجاتىن پايداعا اسىرا الادى. باعدارلاماعا قاتىسۋشىلار جيناقتالعان قاراجاتىن مىنا ماقساتتارعا ونلاين باعىتتاي الادى:
ءوز قاراجاتىن پايدالانۋ مۇمكىندىگىمەن تۇرعىن ءۇي ساتىپ الۋ؛
يپوتەكالىق نەسيەنى مەرزىمىنەن بۇرىن تولىق نەمەسە ءىشىنارا وتەۋ؛
يپوتەكالىق زايم الۋ ءۇشىن باستاپقى جارنا ەنگىزۋ، ونىڭ ىشىندە جوندەۋ جۇمىستارىن جۇرگىزۋگە؛
وتباسى بانكىندەگى دەپوزيتتى تولتىرۋ؛
مببجج باعدارلاماسى (مەملەكەتتىك ءبىلىم بەرۋ جيناقتاۋ جۇيەسى) اياسىندا دەپوزيتتى تولىقتىرۋ؛
قازاقستانداعى وقۋ اقىسىن تولەۋ؛
باسقا ەلدەردەگى وقۋعا اقىسىن تولەۋ؛
وقۋعا العان نەسيەنى تولەۋ.