ۇلتتىق مۋزەي قىزمەتكەرلەرىنە گراموتالار مەن العىس حاتتار تابىس ەتىلدى

الماتى قالاسىندا مادەنيەت جانە سپورت ءمينيسترى داۋرەن ابايەۆ ۇلتتىق مەملەكەتتىك مۋزەي قىزمەتكەرلەرىنە گراموتالار مەن العىس حاتتار تابىس ەتتى.

ول مۋزەي قىزمەتكەرلەرىنە ءوز ىسىنە ادالدىعى، باتىلدىعى جانە ءوز ءومىرىن قاتەرگە تىگىپ، ۇلتتىق مادەني جانە رۋحاني جادىگەرلەردى قورعاعانى ءۇشىن العىسىن ايتتى، دەپ حابارلايدى Almaty-akshamy.kz Elorda.info-عا سىلتەمە جاساپ.

سونداي-اق، مينيستر الماتىداعى جاپپاي تارتىپسىزدىك كەزىندە مۋزەيدى پانالاعان پوليسەيلەر مەن كۋرسانتتاردىڭ ومىرلەرىن ساقتاپ قالعانى ءۇشىن ەرەكشە ريزاشىلىعىن ءبىلدىردى.

«ءسىزدى بۇكىل ەل ماقتان تۇتادى! ءسىز كەرەمەت باتىلدىق پەن تاباندىلىقتىڭ وزىق ۇلگىسىن كورسەتە ءبىلدىڭىز»، – دەدى د. ابايەۆ.

ەل باسىنا كۇن تۋعان، قيىن-قىستاۋ كۇندەرى مۋزەيدى باسقارعان جانە بۇلىكشىلەرمەن كەلىسسوز جۇرگىزۋشى قىزمەتىن اتقارعان مۋزەي ديرەكتورىنىڭ ورىنباسارى بيبىگۇل داندىعارايەۆا ءوزىنىڭ ازاماتتىق جانە كاسىبي بورىشىن اتقارعانىن ايتتى.

«بۇل اكىمدىك ەمەس، بۇل مۋزەي، ءبىز حالقىمىزدىڭ مادەني مۇراسىن ساقتاپ وتىرعان كيەلى ورىن. قولدارىنا لوم، تاياق ۇستاپ كىرىپ كەلگەن جاس جىگىتتەرگە جالىندىم. ەگەر ولار ۇلتتىق جادىگەرلەرىمىزدى قيراتىپ، ورتەپ جىبەرەتىن بولسا، وندا ءوز تاريحىمىزدان ايىرىلامىز. وسى نارسە كوكەيىمنەن كەتپەدى. ءقازىر ءبارى تىنىشتالدى. ماعان اتاق تا، بايلىق تا، ماراپات تا كەرەك ەمەس. ەڭ باستىسى، مۋزەيىمىز امان بولسىن!» - دەدى ول.