ۇلتتىق كينونى قولداۋ ورتالىعى مەملەكەتتىك قولداۋعا ۇمىتكەر كينوجوبالاردى ىرىكتەۋدىڭ ءبىرىنشى كەزەڭىنە سەنارييلەر مەن سەناريي جوسپارلارىن قابىلداۋدىڭ اياقتالدى، دەپ حابارلايدى aqshamnews.kz
ەلەكتروندى تۇردە تىركەلگەن وتىنىمدەردىڭ جالپى سانى – 444.
«2025 جىلى انيماسيالىق، دەرەكتى جانە ويىن فيلمدەرىنىڭ ءارتۇرلى ساناتتارى بويىنشا ءبىرشاما ءوتىنىم كەلىپ ءتۇستى. انيماسيا سالاسىندا 42 ءوتىنىم بەرىلگەن. دەرەكتى-حرونيكالى فيلمدەر ساناتىندا 103 ءوتىنىم ءتۇستى. ويىن فيلمدەرىنە كەلەتىن بولساق، 299 ءوتىنىم كەلگەن.
قۇجاتتاردى قابىلداۋ اياقتالعاننان كەيىن ورتالىق ءوتىنىش بەرۋشىلەر ۇسىنعان قۇجاتتاردى ساراپتاما كەڭەسىنىڭ قاراۋىنا ەنگىزەدى. سەنارييلەردى نەمەسە سەناريي جوسپارلارىن ساراپتاما كەڭەسىنىڭ مۇشەلەرى فيلم تۇرلەرى بويىنشا سەكسيالاردا قاراستىرادى. كەڭەس قۇرامى 20 جۇمىس كۇنى ىشىندە باسىم تاقىرىپتارعا، سيۋجەتتىڭ قۇرىلىمى مەن دراماتۋرگيا پرينسيپتەرى سەكىلدى باستى تالاپتارعا نازار اۋدارىپ، وتىنىمدەردى قاراپ شىعادى. ەكىنشى كەزەڭدە ساراپتاما كەڭەسى ۇسىنعان جوبالاردىڭ قۇجاتتار پاكەتى جيناقتالادى. بۇل رەتتە قاتە ورىن السا، ونى تۇزەۋگە 3 كۇن ۋاقىت بەرىلەدى»، – دەپ حابارلايدى كينو ورتالىعىنىڭ باسپا ءسوز قىزمەتى.
ايتا كەتەيىك، بيىل كونكۋرستىڭ ءبىرىنشى كەزەڭىنە قاتىسۋ ءۇشىن ءوتىنىم قابىلداۋ 5-13 ناۋرىز (12 ناۋرىز ساعات 23:59) ارالىعىندا جۇرگىزىلدى. بۇعان دەيىن قاڭتار ايىندا كينو تۇسىرۋگە ارنالعان باسىم تاقىرىپتار جاريالاندى. سونىمەن قاتار كينو ورتالىعى جانىنان كونسۋلتاسيالىق قولداۋ شارالارى جۇرگىزىلۋدە. كينو ورتالىعىنىڭ كەڭسەسىندە جەكە كونسۋلتاسيالار، تەلەفون قوڭىراۋلارى ارقىلى سۇراقتارعا جاۋاپ بەرىلدى، الەۋمەتتىك جەلىدە جاڭا ەرەجەگە، كونكۋرسقا قاتىستى قاجەتتى مالىمەتتەر جاريالانىپ كەلەدى.