الماتىدا كونكۋرستىق كەزەڭنىڭ ءبىرىنشى كەزەڭى بويىنشا ساراپتاما كەڭەسىنىڭ قورىتىندى وتىرىسى ءوتتى. وزدەرىڭىز بىلەتىندەي، بيىل ساراپتاما كەڭەسىنىڭ قۇرامى جاڭاردى، دەپ حابارلايدى اlmaty-akshamy.kz.
كينوتۋىندىنىڭ ساپاسى تىكەلەي سەنارييگە بايلانىستى. سوندىقتان ۇلتتىق كينو ورتالىعىنىڭ باسقارما ءتوراعاسى قۇرمانبەك جۇماعالي جيىندا كەڭەس مۇشەلەرىن الدىمەن جاۋاپكەرشىلىكتى تەرەڭ سەزىنۋگە شاقىردى.
«كونكۋرس كەزەڭدەرىندە ءادىل شەشىم شىعارۋعا، اشىق كونكۋرس وتكىزۋگە اتسالىسۋ باستى مىندەتىمىز. سەبەبى بۇل شارالار الداعى ۋاقىتتا ۇلتتىق مۇددەگە، ۇلتتىق يدەولوگياعا سايكەس كەلەتىن جوبالاردىڭ ارتۋىنا سەپ بولادى»، – دەدى قۇرمانبەك جۇماعالي.
كەڭەس مۇشەلەرى دە وسىنى نەگىزگە الىپ، كۇن-تۇن دەمەي، كەلىپ تۇسكەن ءاربىر كينوجوباعا ءار كاتەگوريا بويىنشا قورىتىندى بەردى. ءوز سالاسىندا جەتىستىككە جەتكەن، ايتارى بار ماماندار الدىمەن سەنارييلەردىڭ ىشىنەن ۇزدىكتەرىن انىقتاپ، كورەرمەنگە وي سالار شىعارمالاردى سۇزگىدەن وتكىزدى. وسىلايشا، ەكىنشى كەزەڭگە، پيچينگكە جىبەرىلەتىن جوبالاردىڭ جايى تارقاتىلدى.
«كەز كەلگەن تۋىندىنىڭ استارىندا تەرەڭ وي جاتپاسا، ونىڭ قۇنى كوك تيىن. كينو تۇسىرگەن كەزدە دە ونىڭ مازمۇنىن حالقىمىزدىڭ جان-دۇنيەسىمەن، كوزقاراسىمەن، تاربيەسىمەن قابىستىرۋ قاجەت. ساراپشىلار كەڭەسى دە انيماسيالىق، ويىن، دەرەكتى فيلم باعىتتارى بويىنشا سەنارييلەردى قاراۋدا وسىعان ماڭىز بەردى. بۇل رەتتە كورەرمەننىڭ تالعامىمەن ساناسىپ، كۇردەلى تاقىرىپتارعا بارعان شىعارمالار كەزدەسكەنى قۋانتارلىق»، – دەدى ساراپتاما كەڭەسىنىڭ ءتوراعاسى، اكتەر، كينورەجيسسەر دوسحان جولجاقسىنوۆ.
ۇلتتىق كينو ورتالىعىنىڭ ماقساتى – اشىق ءارى ءادىل كونكۋرس وتكىزۋ. الداعى ۋاقىتتا مەملەكەتتىك قولداۋعا ۇمىتكەر كينوجوبالاردى ىرىكتەۋدىڭ ءبىرىنشى كەزەڭى بويىنشا اقپاراتتار ورتالىقتىڭ رەسمي سايتى مەن الەۋمەتتىك جەلىلەرىندەگى پاراقشالارىندا جاريالاناتىن بولادى.