بيىل ۇلتتىق كينو ورتالىعىنىڭ قولداۋىمەن 10 جاڭا فيلم پروكاتقا شىعىپ، كورەرمەندەردى قۋانتپاق. بۇل فيلمدەردە جاس ۇرپاقتىڭ تاربيەسىنە وڭ ىقپال ەتەتىن، كورەرمەنگە وي سالاتىن ماڭىزدى يدەيالار كورىنىس تاپقان، دەپ حابارلايدى aqshamnews.kz
كورەرمەنگە ۇسىنىلاتىن فيلمدەردىڭ ىشىندە 2011 جىلى تارازداعى تەراكتىدە قازا تاپقان باتىر پوليسەي عازيز بايتاسوۆقا ارنالعان «كاپيتان بايتاسوۆ» ءفيلمى بار. سونىمەن قاتار، لۋدومانيا تاقىرىبىن قوزعايتىن «يگرومانكا» ءفيلمى قوعامداعى وزەكتى ماسەلەلەردى كوتەرەدى. ال «90+1» كارتيناسى جاستاردى سالاۋاتتى ءومىر سالتىن ۇستانۋعا جانە سپورتقا قىزىعۋشىلىق تانىتۋعا شابىتتاندىرادى.
سونداي-اق، «وسەننيي بريز»، «فەيكوۆىي ارمان»، «Qaitadan»، «تەزەك»، «قارا قىز»، «التىن ادام»، «اروماتنوە سەردسە» جانە «ءابىل» فيلمدەرى دە كينوتەاترلاردا كورسەتىلەدى.
ۇلتتىق كينو ورتالىعىنىڭ باسقارما ءتوراعاسى قۇرمانبەك ءجۇماعاليدىڭ ايتۋىنشا، كينو ۇلتتىق يدەولوگيانى قالىپتاستىراتىن ماڭىزدى قۇرال بولىپ تابىلادى.
«مەملەكەت قارجىسىنا تۇسىرىلگەن كينولاردا قوعامعا قاجەتتى قۇندىلىقتاردى دارىپتەۋ باستى مىندەت. پرەزيدەنت قاسىم-جومارت توقايەۆ تا كينويندۋستريانى مادەنيەتتىڭ ءبىر بولىگى عانا ەمەس، ەكونوميكانىڭ جەكە تارماعى رەتىندە قاراستىرۋدى تاپسىرعان بولاتىن. وسى باعىتتا جاڭا فيلمدەرگە ەرەكشە نازار اۋدارىلدى. كورەرمەن كوڭىلىنەن شىعادى دەپ سەنەمىز»، – دەدى باسقارما ءتوراعاسى.
سونىمەن قاتار، ناۋرىز ايىنىڭ باسىندا جاڭا كينوجوبالار كونكۋرسى باستالاتىنى حابارلاندى. بيىلعى باستى تاقىرىپتار تىزىمىندە وتانعا دەگەن سۇيىسپەنشىلىك، تاريح پەن تاعىلىم، ءبىلىم، وتباسى، ەڭبەك ادامىنىڭ ەرلىگى سەكىلدى ماڭىزدى ماسەلەلەر قامتىلعان. تولىق ءتىزىمدى كينو ورتالىعىنىڭ رەسمي سايتىنان كورۋگە بولادى.
وتكەن جىلى كينوجوبالاردى ىرىكتەۋ ەرەجەسىنە وزگەرىستەر ەنگىزىلگەن بولاتىن. جاڭا ەرەجەلەرگە سايكەس، كونكۋرستىڭ ءبىرىنشى كەزەڭىندە سەنارييلەر قابىلدانىپ، ۇزدىكتەرى ساراپتاما كەڭەسىنىڭ قاراۋىنا جىبەرىلەدى. كينوگەرلەرگە سەناريي جازۋعا شامامەن ەكى اي ۋاقىت بەرىلەدى.
بۇل جاڭا فيلمدەر ۇلتتىق قۇندىلىقتاردى دارىپتەپ، كورەرمەنگە تاعىلىمدى وي سالۋعا باعىتتالعان. الداعى ۋاقىتتا وتاندىق كينويندۋستريانىڭ دامۋىنا تىڭ سەرپىن بەرەتىن جوبالار كۇتىلۋدە.