ۇلتتىق كەڭەستىڭ كەزەكتى كەزدەسۋى ءوتتى

27 جەلتوقساندا نۇر-سۇلتان قالاسىندا ۇلتتىق قوعامدىق سەنىم كەڭەسى مۇشەلەرىنىڭ جۇمىس كەزدەسۋى ءوتتى، دەپ حابارلايدى اlmaty-akshamy.kz

جالپى العاندا، ۇلتتىق كەڭەس قۇرىلعاننان بەرى مەملەكەت باسشىسىنىڭ باستامالارىن ىسكە اسىرۋ ماقساتىندا 90-نان استام نورماتيۆتىك قۇقىقتىق اكتىلەر قابىلداندى. قازىرگى ۋاقىتتا تاعى 12 زاڭ جوباسى ازىرلەۋ جانە قاراۋ ساتىسىندا.

سونداي-اق وتىرىستا ۇقسك مۇشەلەرى الداعى جىلى ۇيىمداستىرىلاتىن زەرتتەۋ جۇمىستارىنىڭ تاقىرىپتار تىزبەسىن تالقىلادى. بۇل زەرتتەۋ جۇمىستارى نەگىزىندە مەملەكەتتىك ورگاندارعا ارنايى ۇسىنىستار ازىرلەنەدى دەپ بولجانۋدا. ۇقسك اياسىنداعى 4 جۇمىس توبىنىڭ ءارقايسىسىنىڭ شەڭبەرىندە بەلگىلى ءبىر باعىتتاعى وزەكتى ماسەلەلەر جەكە-جەكە زەردەلەنەتىن بولادى. 

اتاپ ايتساق، جەمىس تۇرماعامبەتوۆا، ءبورىحان نۇرمۇحامەدوۆ، مۇرات ابەنوۆ، ساياسات نۇربەك، تولەۋتاي راقىمبەكوۆ، مارات ءباشىموۆ، راسۋل جۇمالى، لاززات قوجاحمەتوۆا، داۋرەن قۋات، اسحات سادىرباي، الەكساندر دانيلوۆ، تاتتىگۇل تالايەۆا، دانيا ەسپايەۆا، قانات نۇروۆ، قايسار تۇرسىنقوجا، قانات ساحاريا، بەرىك ءابدىعالي ۇلى، اندرەي چەبوتاريەۆ، ايمان وماروۆا جانە يسلامبەك سالجانوۆ  زەرتتەۋلەردى وتكىزۋگە قاتىستى ءوز ۇسىنىستارىمەن ءبولىستى.

سونىمەن قاتار، جيىنعا قاتىسۋشىلار كەلەسى جىلى ءتۇرلى سالالارداعى رەفورمالاردىڭ جۇزەگە اسىرۋ بارىسىن تالقىلاۋ بويىنشا مەملەكەتتىك ورگاندار باسشىلارىنىڭ قاتىسۋىمەن جوسپارلاناتىن كەزدەسۋلەردى وتكىزۋ،  وڭىرلەردە كوشپەلى وتىرىستاردى ۇيىمداستىرۋ سۇراقتارىنا توقتالدى.

قازاقستان رەسپۋبليكاسى پرەزيدەنتى جانىنداعى ۇلتتىق قوعامدىق سەنىم كەڭەسى كونسۋلتاسيالىق-كەڭەسشى ورگان بولىپ تابىلادى. ونىڭ نەگىزگى ماقساتى – قوعام قايراتكەرلەرى، ساياسي پارتيا وكىلدەرى جانە ساراپشىلارمەن كەڭىنەن تالقىلاۋ وتكىزۋ نەگىزىندە مەملەكەتتىك ساياساتتىڭ كوكەيكەستى ماسەلەلەرى بويىنشا ۇسىنىستار مەن ۇسىنىمدار ازىرلەۋ. ۇلتتىق كەڭەستى قۇرۋ تۋرالى جارلىققا 2019 جىلعى 12 ماۋسىمدا قول قويىلعان.